പുലി ചത്തത് സ്വാഭാവിക കാരണങ്ങളാൽ: പോസ്റ്റ്മോർട്ടം റിപ്പോർട്ട്

കരുളായി∙ പടുക്ക വനത്തിൽ ബാലംകുളത്ത് ജനവാസ മേഖലയ്ക്ക് സമീപം പുലി ചത്തത് സ്വാഭാവിക കാരണങ്ങളാലാണെന്നു പോസ്റ്റ്മോർട്ടം റിപ്പോർട്ട്. ഉദരത്തിന്റെ അടിഭാഗത്ത് തുമ്പിക്കൈകൊണ്ട് അടിയേറ്റ ചതവുണ്ടെങ്കിലും അതു മാരകമല്ലെന്നാണു ഡോക്ടർമാരുടെ നിഗമനം. 2ന് ഉച്ച കഴിഞ്ഞ് 4ന് ആണ് 10 വയസ്സ് തോന്നിക്കുന്ന ആൺപുലിയുടെ ജഡം കണ്ടത്.നാഷനൽ ടൈഗർ കൺസർവേഷൻ അതോറിറ്റിയുടെ മാർഗരേഖ പ്രകാരം വെറ്ററിനറി ഡോക്ടർമാരായ കെ.എൻ.നൗഷാദലി, എസ്.ശ്യാം ,ടി.മുഹമ്മദ് റൈനു ഉസ്മാൻ എന്നിവർ ചേർന്നാണു പോസ്റ്റ്മോർട്ടം നടത്തിയത്.

അതോറിറ്റി പ്രതിനിധി ഡോ. അനൂപ് ദാസ്, നിലമ്പൂർ സൗത്ത് ഡിഎഫ്ഒ ജി.ധനിക് ലാൽ, റേഞ്ച് ഓഫിസർ പി.കെ.മുജീബ് റഹ്മാൻ, ഡപ്യൂട്ടി റേഞ്ച് ഓഫിസർ ജി.അംജിത്, മൂത്തേടം പഞ്ചായത്ത് പ്രസിഡന്റ് പി.ഉസ്മാൻ എന്നിവർ സന്നിഹിതരായിരുന്നു. ജഡം ദഹിപ്പിച്ചു.