നിപ്പ: സ്ഥിതി വിലയിരുത്തി വളാഞ്ചേരി നഗരസഭ
Mail This Article
വളാഞ്ചേരി ∙ നഗരസഭയിലെ രണ്ടാം വാർഡിൽ ഒരാൾക്ക് നിപ്പ വൈറസ് സ്ഥിരീകരിച്ചതിനെ തുടർന്ന് ചില വാർഡുകൾ കണ്ടെയ്ൻമെന്റ് സോണുകളായി പ്രഖ്യാപിച്ച സാഹചര്യത്തിൽ നഗരസഭാധ്യക്ഷൻ അഷ്റഫ് അമ്പലത്തിങ്ങലിന്റെ അധ്യക്ഷതയിൽ പ്രത്യേക യോഗം ചേർന്ന് പ്രവർത്തനങ്ങൾ വിലയിരുത്തി.
കണ്ടെയ്ൻമെന്റ് സോണുകളിൽ പൊതുജനങ്ങൾ കൂട്ടം കൂടാൻ പാടില്ലെന്നും വ്യാപാരസ്ഥാപനങ്ങൾ രാവിലെ 8 മുതൽ വൈകിട്ട് 6 വരെ മാത്രമേ പ്രവർത്തിക്കാൻ പാടുള്ളൂ എന്നും നിർദേശിച്ചു. പനി, ഛർദി രോഗലക്ഷണമുള്ളവർ സ്വയം ചികിത്സ ഒഴിവാക്കി പിഎച്ച്സിയിൽ ചികിത്സ തേടണം. കണ്ടെയ്ൻമെന്റ് സോണുകളിൽ ഉൾപ്പെടാത്ത സ്ഥലങ്ങളിലും സാമൂഹിക അകലം പാലിച്ച് മാസ്ക് ധരിക്കാൻ ശ്രദ്ധിക്കണമെന്നും യോഗം ആവശ്യപ്പെട്ടു.
നഗരസഭാ ഉപാധ്യക്ഷ റംല മുഹമ്മദ്, സ്ഥിരസമിതി അധ്യക്ഷൻ മുജീബ് വാലാസി, സെക്രട്ടറി എച്ച്.സീന, കൗൺസിലർമാരായ ഇ.പി.അച്യുതൻ, ശിഹാബ് പാറക്കൽ, വീരാൻകുട്ടി പറശ്ശേരി, പിഎച്ച്സി മെഡിക്കൽ ഓഫിസർ ഡോ. പി.ഫാത്തിമ, എച്ച്ഐ ജോൺസൺ പി.ജോർജ്, നഗരസഭ എച്ച്ഐ കെ.പി.സലീം തുടങ്ങിയവർ പങ്കെടുത്തു.