ഇരുൾ‍ക്കുന്നിൽ കടുവയുണ്ടോ? സ്ഥിരീകരിച്ചില്ലെന്ന് വനപാലകർ

എടക്കര ∙ ഇരുൾക്കുന്ന് വനമേഖലയിൽ കണ്ടത് കടുവയാണെന്നു സ്ഥിരീകരിക്കാനായിട്ടില്ലെന്നു വനപാലകർ. ഈ വനമേഖലയിൽ അടുത്തൊന്നും കടുവയുടെ സാന്നിധ്യം ഉണ്ടായിട്ടില്ലെന്നാണ് വനപാലകർ പറയുന്നത്. കാട്ടിൽ തേൻ ശേഖരിക്കാൻ പോയ ആദിവാസിയാണ് കടുവയെ കണ്ടതായി വെളിപ്പെടുത്തിയത്. എന്നാലിത് പുലി വർഗത്തിൽപ്പെട്ട ഏതെങ്കിലും ജീവിയാകുമെന്നാണ് വനപാലകരുടെ വിലയിരുത്തൽ. പ്രദേശത്ത് കണ്ടെത്തിയ കാൽപാടുകൾ കടുവയുടെതാണെന്ന് സ്ഥിരീകരിക്കാൻ കഴിഞ്ഞിട്ടില്ല. കടുവയെ കണ്ടുവെന്ന സംശയം ഉയർന്ന സാഹചര്യത്തിൽ വനപാലകർ നിരീക്ഷണം ഏർപ്പെടുത്തിയിട്ടുണ്ട്.