9 കേന്ദ്രങ്ങൾ,72 ബൂത്തുകൾ: വാക്സിനേഷന് ഇന്നു തുടക്കം

മുംബൈ ∙ കാത്തിരിപ്പിനൊടുവിൽ കോവിഡ് വാക്സിനേഷന് ഇന്നു തുടക്കം. മുംബൈയിൽ 9 കേന്ദ്രങ്ങളിലാണ് വാക്സീൻ വിതരണമുള്ളത്. കല്യാൺ-ഡോംബിവ്‍ലി മേഖലയിൽ 4 കേന്ദ്രങ്ങളും നവിമുംബൈ കോർപറേഷനിൽ 5 കേന്ദ്രങ്ങളുമാണുള്ളത്.

രണ്ടു സംഭരണ കേന്ദ്രങ്ങൾ
കാഞ്ജൂർമാർഗ്, എഫ് സൗത്ത് വാർഡ് എന്നിവിടങ്ങളിലാണ് മുംബൈ നഗരത്തിൽ കോവിഡ് വാക്സീൻ സൂക്ഷിച്ചിരിക്കുന്ന കേന്ദ്രങ്ങൾ.

72 വാക്സിനേഷൻ ബൂത്തുകൾ
മുംബൈയിൽ 4 മെഡിക്കൽ കോളജുകൾ അടക്കം 8 ആശുപത്രികളിലും ബാന്ദ്ര-കുർള കോംപ്ലക്സിലെ ജംബോ കോവിഡ് ചികിൽസാ കേന്ദ്രത്തിലുമാണ് വാക്സിനേഷൻ. ഇൗ കേന്ദ്രങ്ങളിലായി 72 വാക്സിനേഷൻ ബൂത്തുകളാണുള്ളത്. ഒരു ബൂത്തിൽ വാക്സിനേഷന് പരിശീലനം ലഭിച്ച 5 ആരോഗ്യപ്രവർത്തകരാണുണ്ടാവുക.

ഒരു ദിവസം 15,000 പേർ
പ്രതിദിനം 15,000 പേരുടെ വാക്സിനേഷനാണ് മുംബൈ നഗരത്തിലെ കേന്ദ്രങ്ങളിൽ സൗകര്യമുള്ളത്. ഇതുവരെ 12 ലക്ഷത്തിലധികം ആരോഗ്യപ്രവർത്തകരാണു റജിസ്റ്റർ ചെയ്തിരിക്കുന്നത്.