ബസിറങ്ങുന്ന യാത്രക്കാരന് കൂട്ടിന് ‘ബെസ്റ്റ് ’ ഇ–ബൈക്ക്

മുംബൈ∙ ബെസ്റ്റ് ബസുകളിൽ നിന്ന് ഇറങ്ങുന്ന യാത്രക്കാർക്ക്  ലക്ഷ്യസ്ഥാനത്തേക്കും തിരിച്ചും യാത്ര ചെയ്യാൻ ഇനി ഓട്ടോയോ ടാക്സിയോ വേണ്ടി വരില്ല.  ബെസ്റ്റിന്റെ 180 ബസ് സ്റ്റോപ്പുകളിലായി ഇ-ബൈക്ക് സർവീസിന് ബെസ്റ്റ് അധികൃതർ തുടക്കമിട്ടു. അന്ധേരി, വിലെ പാർലെ, ജുഹു, സാന്താക്രൂസ്, ഖാർ, ബാന്ദ്ര, മാഹിം, ദാദർ എന്നിവിടങ്ങളിൽ ആണ് ഇ-ബൈക്ക് സർവീസ് ഉള്ളത്. വൈകാതെ നഗരത്തിന്റെ മറ്റ് ഭാഗങ്ങളിലേക്കും വ്യാപിപ്പിക്കും. നിലവിൽ ആയിരം ഇ-ബൈക്കുകൾ ലഭ്യമാണ്. അടുത്ത വർഷം ജൂണിനകം 5,000 ഇ-ബൈക്കുകൾ ഇറക്കാൻ ലക്ഷ്യമിടുന്നു. വോഗോ എന്ന സ്വകാര്യ കമ്പനിയുമായി സഹകരിച്ചാണ് പദ്ധതി നടപ്പാക്കിയത്. 

കഴിഞ്ഞ ജൂൺ മുതൽ ബെസ്റ്റ് പരീക്ഷണാടിസ്ഥാനത്തിൽ ഇ-ബൈക്ക് സർവീസ് നടത്തുന്നുണ്ട്.  ഇതിനകം  ലഭിച്ച മികച്ച പ്രതികരണം പദ്ധതി വ്യാപിപ്പിക്കാൻ പ്രോത്സാഹനമായി. 40,000ത്തോളം  ആളുകൾ ഇപ്പോൾ തന്നെ   ഇ-ബൈക്ക് സർവീസിനായി റജിസ്റ്റർ ചെയ്തിട്ടുണ്ട്.    ഇത്തരം അധിക സേവനങ്ങൾ മുംബൈയിൽ എവിടെയും യാത്ര ചെയ്യാൻ ബെസ്റ്റ് ബസുകൾ ഉപയോഗിക്കാൻ  കൂടുതൽ പേരെ പ്രേരിപ്പിക്കുകയും അതു വഴിയാത്രക്കാരുടെ എണ്ണം വർധിക്കുകയും ചെയ്യുമെന്നാണ് ബെസ്റ്റ് അധികൃതരുടെ പ്രതീക്ഷ.  ഇ-ബൈക്ക് സർവീസ് വൈകാതെ ബെസ്റ്റിന്റെ ചലോ ആപ്പുമായി ബന്ധിപ്പിക്കും. 

നേട്ടങ്ങൾ

∙ നിരത്തിൽ നിന്ന്  വീട്ടിലേക്ക് സുരക്ഷിത യാത്രാ

∙ പരമാവധി വേഗം മണിക്കൂറിൽ 25 കിലോമീറ്റർ അപകട സാധ്യത കുറയും

∙ വായു, ശബ്ദ  മലിനീകരണങ്ങളില്ല

എങ്ങനെ ഉപയോഗിക്കാം

∙ വോഗോ (Vogo) ആപ്പ് ഡൗൺലോഡ് ചെയ്ത് ഓൺലൈൻ റജിസ്ട്രേഷൻ പൂർത്തിയാക്കുക 

∙ ആപ്പ് ഉപയോഗിച്ച് ഏറ്റവും അടുത്തുള്ള ഇ-ബൈക്ക് സ്റ്റേഷൻ കണ്ടെത്തുക 

∙ സ്റ്റേഷനിൽ എത്ര ബൈക്കുകൾ ലഭ്യമാണെന്നും അവയുടെ നിലവിലെ ബാറ്ററി ലെവലും ആപ്പിൽ കാണാം 

∙ ഇനി ആപ്പ് ഉപയോഗിച്ച്  ഒരു ബൈക്ക് അൺലോക്ക് ചെയ്ത് സവാരി ആരംഭിക്കാം

∙ 20 രൂപയാണ് അടിസ്ഥാന നിരക്ക്.  കിലോമീറ്ററിന് 3 രൂപയും മിനിറ്റിന് 1.50 രൂപയും വീതം നൽകേണ്ടി വരും.

∙ യാത്രയുടെ അവസാനം യാത്രക്കാരുടെ വോഗോ വാലറ്റിൽ നിന്ന് യാത്രാ നിരക്ക് ഈടാക്കും