മെട്രോ 3: രണ്ടാംഘട്ടം മേയ് 1ന് തുറക്കുന്നു; മഹാരാഷ്ട്രാ ദിനത്തിൽ പുത്തൻ പാതയും

മുംബൈ∙ ഏറെ പ്രതീക്ഷയോടെ കാത്തിരിക്കുന്ന മെട്രോ മൂന്നിന്റെ രണ്ടാംഘട്ട പാത മഹാരാഷ്ട്ര ദിനമായ മേയ് 1ന് തുറന്നേക്കും. പ്രധാനമന്ത്രി നരേന്ദ്ര മോദിയാകും ഉദ്ഘാടനം നിർവഹിക്കുന്നത്. റെയിൽവേ സേഫ്റ്റി കമ്മിഷണറുടെ സുരക്ഷാ റിപ്പോർട്ട് നാളെ വൈകിട്ടോടെ ലഭിക്കും. പരീക്ഷണയോട്ടം നേരത്തെ പൂർത്തിയായിരുന്നു. ബികെസി മുതൽ ആചാര്യ അത്രേ ചൗക്ക് വരെയുള്ള ഭാഗമാണ് രണ്ടാം ഘട്ടത്തിൽ തുറക്കുന്നത്. 

 ആരേ കോളനി മുതൽ ബികെസി വരെയുള്ള 12.69 കിലോമീറ്റർ ഭാഗം നേരത്തേ തുറന്നിരുന്നു. രണ്ടാംഘട്ടം കൂടി തുറക്കുന്നതോടെ 22.46 കിലോമീറ്ററും പ്രവർത്തന സജ്ജമാകും. കഫ് പരേഡ് വരെയുള്ള അടുത്ത ഘട്ടം ഓഗസ്റ്റ് ആദ്യവാരത്തിൽ തുറന്നേക്കും. ഇതിന്റെ 96 ശതമാനം നിർമാണപ്രവർത്തനങ്ങളും പൂർത്തിയായി.

മുംബൈ നഗരത്തിൽ നിലവിലുള്ള സർവീസുകൾ 
മെട്രോ 1: ഘാട്കോപ്പറിൽനിന്ന് വെർസോവയിലേക്ക് 11.4 കിലോമീറ്റർ 
മെട്രോ 2 എ: ദഹിസറിൽനിന്ന് ഡിഎൻ നഗറിലേക്ക് 18.6 കിലോമീറ്റർ  
മെട്രോ 7 : അന്ധേരിയിൽനിന്ന് ദഹിസറിലേക്ക് 16.4 കിലോമീറ്റർ 
മെട്രോ 3: ആരേ കോളനിയിൽനിന്ന് ബികെസി വരെ 12.5 കിലോമീറ്റർ.

രണ്ടാം ഘട്ടത്തിൽ 6 സ്റ്റേഷൻ 
ധാരാവി, ശിതളാദേവി, ദാദർ, സിദ്ധിവിനായക്, വർളി, ആചാര്യ അത്രേ ചൗക്ക് എന്നീ സ്റ്റേഷനുകളാണ് ഈ ഘട്ടത്തിൽ തുറക്കുക. പൂർണമായും തുരങ്കപാതയാണ് മെട്രോ മൂന്ന്. മെട്രോ ലൈൻ 3 എന്നറിയപ്പെടുന്ന ഭൂഗർഭപാതയ്ക്ക് അക്വാലൈൻ എന്നും പേരുണ്ട്. ആകെ 33.5 കിലോമീറ്റർ വരുന്ന പാതയിൽ 27 സ്റ്റേഷനുകളാണുള്ളത്.