യാത്രികരുടെ പ്രിയമേറി; 4 കോച്ച് കൂട്ടി മുംബൈ– ഗാന്ധിനഗർ വന്ദേഭാരത്

മുംബൈ ∙ മുംബൈ– ഗാന്ധിനഗർ വന്ദേഭാരത് ട്രെയിൻ 16ൽ നിന്ന് 20 കോച്ചുകളുടേതാക്കി (2 എക്സിക്യൂട്ടീവ് കോച്ചുകളും 18 എസി ചെയർകാർ കോച്ചുകളും) മാറ്റുന്നു.  മഹാരാഷ്ട്ര– ഗുജറാത്ത് സംസ്ഥാന തലസ്ഥാനങ്ങളെ ബന്ധിപ്പിച്ച്, ആഴ്ചയിൽ 6 ദിവസം സർവീസ് നടത്തുന്ന വന്ദേഭാരതിൽ തിരക്ക് കൂടുന്ന സാഹചര്യത്തിലാണു കൂടുതൽ കോച്ചുകൾ ഘടിപ്പിക്കുന്നത്. അതോടെ, രാജ്യത്തെ ആദ്യത്തെ 20 കോച്ച് വന്ദേഭാരത് എക്സ്പ്രസ് സർവീസായി അതു മാറും. നിലവിൽ 8, 16 കോച്ചുകളുടെ വന്ദേഭാരത് ട്രെയിനുകളാണു രാജ്യത്ത് സർവീസ് നടത്തുന്നത്. 

അധികമായി ലഭിക്കുന്ന 4 കോച്ചുകളിലായി 312 യാത്രക്കാർക്കു കൂടി സഞ്ചരിക്കാനാകുമെന്നും അതോടെ തിരക്കു കുറയുമെന്നും റെയിൽവേ വൃത്തങ്ങൾ പറഞ്ഞു. നിലവിൽ 1,128 യാത്രക്കാരെ ഉൾക്കൊള്ളാനാകുന്ന ട്രെയിനിന്റെ ശേഷി 1,440 ആയാണ് ഉയരുക. മുംൈബ സെൻട്ര‍ൽ, ബോറിവ്‌ലി, വാപി, സൂറത്ത്, വഡോദര, ആനന്ദ്, അഹമ്മദാബാദ്, ഗാന്ധിനഗർ സ്റ്റേഷനുകളിലാണു സ്റ്റോപ്പുള്ളത്.