വെട്ടുകിളി വിമാനയാത്രയ്ക്കും ഭീഷണിയെന്ന് ഡിജിസിഎ
Mail This Article
ന്യൂഡൽഹി ∙ വെട്ടുകിളികൾ വ്യോമഗതാഗതത്തിനും ഭീഷണിയാവാൻ സാധ്യതയെന്നു ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) മുന്നറിയിപ്പ്. രാജസ്ഥാൻ, പഞ്ചാബ്, ഗുജറാത്ത് ഉൾപ്പെടെയുള്ള സംസ്ഥാനങ്ങളിൽ കൃഷിയിടങ്ങളിൽ വ്യാപക നാശം സൃഷ്ടിച്ച വെട്ടുകിളികൾ ഡൽഹിയിലേക്കും എത്താനുള്ള സാധ്യത മുൻനിർത്തി സ്വീകരിക്കേണ്ട മുൻകരുതലുകൾ ഡിജിസിഎ വിശദീകരിച്ചു.
പൈലറ്റുമാർ, വിമാനത്താവളങ്ങളിലെ എൻജിനീയർമാർ എന്നിവർ സ്വീകരിക്കേണ്ട മുൻകരുതലുകൾ സംബന്ധിച്ചാണു മാർഗനിർദേശം പുറപ്പെടുവിച്ചത്. താഴ്ന്നു പറക്കുന്ന വെട്ടുകിളിക്കൂട്ടങ്ങൾ വിമാനങ്ങൾ പറന്നുയരുമ്പോഴും ഇറങ്ങുമ്പോഴും ഭീഷണിയാകാമെന്നു മുന്നറിയിപ്പിൽ പറയുന്നു. വെട്ടുകിളിക്കൂട്ടങ്ങൾക്കിടയിലൂടെ പറന്നുയരുന്നതും ഇറങ്ങുന്നതും കാരണം എൻജിൻ, എസി സംവിധാനങ്ങൾക്കു തകരാറുണ്ടാകാൻ സാധ്യതയുള്ളതിനാൽ മുൻകരുതൽ സ്വീകരിക്കണമെന്നാണു നിർദേശം.