ചൂടു കൂടി; തനിയെ നിന്ന് ഇലക്ട്രിക് ബസ്

ന്യൂഡൽഹി ∙ മുഖ്യമന്ത്രി ഉദ്ഘാടനം ചെയ്തതിനു പിന്നാലെ സർവീസ് ആരംഭിച്ച ഇലക്ട്രിക് ബസിനു സാങ്കേതിക തകരാർ. ബസിന്റെ എൻജിനിൽ ചൂടു വർധിച്ചതിനെ തുടർന്ന് ബസ് തനിയെ നിൽക്കുകയായിരുന്നു. ബസിലെ ആധുനിക സുരക്ഷാ സജ്ജീകരണം കാരണം എൻജിൻ പെട്ടെന്നു നിലച്ചതായി ‍ഡിടിസി അധികൃതർ വ്യക്തമാക്കി. 150 പുതിയ ഇലക്ട്രിക് ബസുകളാണ് കഴിഞ്ഞ ദിവസം മുഖ്യമന്ത്രി അരവിന്ദ് കേജ്‍രിവാൾ ഉദ്ഘാടനം ചെയ്തത്. ഇതിനു പിന്നാലെ ഇന്ദ്രപ്രസ്ഥ ഡിപ്പോയിൽ നിന്നു സർവീസ് ആരംഭിച്ച ബസുകളിൽ ഒരെണ്ണത്തിനാണു തകരാറുണ്ടായത്. രണ്ടു മണിക്കൂറിനുള്ളിൽ തകരാർ പരിഹരിച്ച് ബസ് വീണ്ടും സർവീസ് ആരംഭിച്ചെന്നും ഡിടിസി അറിയിച്ചു.