യമുനാ നദി തീരപ്രദേശങ്ങളിലെ വീടുകൾ വെള്ളത്തിനടിയിൽ തന്നെ

ന്യൂഡൽഹി ∙ യമുനാ നദിയിലെ ജലനിരപ്പിൽ നേരിയ കുറവുണ്ടെങ്കിലും വെള്ളമിറങ്ങാത്തതിനാൽ തീരപ്രദേശങ്ങളിലെ വീടുകളിലേക്ക് മടങ്ങാനാവാതെ കുടുംബങ്ങൾ. ജലനിരപ്പ് ഇപ്പോഴും അപകടനിലയ്ക്കു മുകളിലാണെന്ന് അധികൃതർ വ്യക്തമാക്കി. ഹരിയാനയിലെ ഹത്നി കുണ്ഡ് ഡാമിൽ നിന്നു തുറന്നുവിടുന്ന ജലത്തിന്റെ അളവു കുറച്ചതോടെയാണ് യമുനയിലെ ജലനിരപ്പ് കുറയാൻ തുടങ്ങിയത്. 

വൃഷ്ടിപ്രദേശങ്ങളിൽ ഉൾപ്പെടെ മഴ കുറഞ്ഞതിനാൽ രണ്ടു ദിവസത്തിനുള്ളിൽ ജലനിരപ്പ് സാധാരണ നിലയിലാവുമെന്നാണ് പ്രതീക്ഷ. വെള്ളം പൂർണമായും ഇറങ്ങുന്നതുവരെ ജനങ്ങളെ തീരപ്രദേശങ്ങളിലേക്ക് തിരിച്ചയയ്ക്കാതിരിക്കാൻ ജാഗ്രത പുലർത്തുന്നുണ്ട്. ഇതിനായി സിവിൽ ഡിഫൻസ് വൊളന്റിയർമാരുടെ സേവനം പ്രയോജനപ്പെടുത്തുന്നുണ്ടെന്നും ജില്ലാ അധികൃതർ വ്യക്തമാക്കി.