ചാന്ദ്നി ചൗക്കിൽ തീപിടിത്തം; നൂറോളം കടകൾ കത്തി

ന്യൂഡൽഹി∙ ചാന്ദ്നി ചൗക്കിലെ ഭാഗീരഥ് പാലസ് മാർക്കറ്റിലുണ്ടായ വൻ തീപിടിത്തത്തിൽ നൂറോളം കടകൾ കത്തിനശിച്ചു. സംഭവത്തിൽ ആർക്കും പരുക്കില്ലെന്ന് അഗ്നിശമന സേന അറിയിച്ചു. ഇലക്ട്രിക്കൽ, ഇലക്ട്രോണിക് ഉൽപന്നങ്ങൾ വിൽക്കുന്ന മാർക്കറ്റിൽ വ്യാഴാഴ്ച രാത്രി ഒൻപതരയോടെയാണ് തീപടർന്നത്. അഗ്നിശമന സേന മണിക്കൂറുകൾ പരിശ്രമിച്ചാണ് തീയണച്ചത്. തീപിടിത്തത്തിന്റെ കാരണം വ്യക്തമല്ല. ഇന്നലെ രാവിലെയോടെയാണ് തീ പൂർണമായും നിയന്ത്രണ വിധേയമായത്. 

ഒരു കടയിൽ നിന്നാണ് തീ മാർക്കറ്റിലെ മറ്റു കടകളിലേക്കും പടർന്നു പിടിച്ചത്.    നാൽപ്പതോളം അഗ്നിശമന വാഹനങ്ങൾ ഉപയോഗിച്ചാണ് തീപടരാതെ നിയന്ത്രിച്ചത്. കടകളിൽ പലതും കാലപ്പഴക്കം കാരണം തകരാൻ സാധ്യതയുള്ളതിനാൽ ആളുകളെ പ്രദേശത്തേക്ക് അടുപ്പിക്കാതെ അഗ്നിശമന സേനയും പൊലീസും ചേർന്നാണ് തീയണയ്ക്കാനുള്ള നടപടികൾ ആരംഭിച്ചത്. മാർക്കറ്റിലെ 3 കെട്ടിടങ്ങൾ തകർന്നു വീഴുകയും ചെയ്തു. തീപിടിത്തത്തിൽ കോടിക്കണക്കിനു രൂപയുടെ നഷ്ടമുണ്ടായതായി വ്യാപാരികൾ പറഞ്ഞു.