ജനുവരി മുതൽ സിഎൻജി, ഇലക്ട്രിക് ഓട്ടോകൾക്ക് മാത്രം റജിസ്ട്രേഷൻ

ന്യൂഡൽഹി ∙ ജനുവരി ഒന്നു മുതൽ സിഎൻജി, ഇലക്ട്രിക് ഓട്ടോകൾ മാത്രമേ ദേശീയതലസ്ഥാന മേഖലയിൽ റജിസ്റ്റർ ചെയ്യാൻ അനുവദിക്കാവൂ എന്നു കേന്ദ്ര വായുമലിനീകരണ നിയന്ത്രണ കമ്മിഷൻ സംസ്ഥാനങ്ങൾക്കു നിർദേശം നൽകി.   യുപി, രാജസ്ഥാൻ, ഹരിയാന ഉൾപ്പെടെയുള്ള സംസ്ഥാനങ്ങൾക്കും ഈ നിർദേശം നൽകിയിട്ടുണ്ട്. 2026 അവസാനത്തോടെ ഡീസൽ ഓട്ടോറിക്ഷകൾ ദേശീയതലസ്ഥാന മേഖലയിൽ നിന്നു പൂർണമായി ഇല്ലാതാക്കുന്നതിന്റെ ഭാഗമായാണിത്. 2027 ജനുവരി ഒന്നു മുതൽ സിഎൻജി, ഇലക്ട്രിക് ഓട്ടോകൾ മാത്രമാക്കുക എന്നതാണു ലക്ഷ്യമെന്ന് അധികൃതർ പറഞ്ഞു. ഡൽഹിയും ഹരിയാനയിലെ 14 ജില്ലകളും  യുപിയിലെ എട്ടും രാജസ്ഥാനിലെ രണ്ടും ജില്ലകളും ഉൾപ്പെടുന്നതാണ് എൻസിആർ മേഖല.