ഡൽഹി ബജറ്റിന് അനുമതി നിഷേധിച്ച് കേന്ദ്രസർക്കാർ

ന്യൂഡൽഹി ∙ ഡൽഹി സർക്കാരിന്റെ ബജറ്റ് അവതരണത്തിനു കേന്ദ്രത്തിന്റെ വിലക്ക്. കേന്ദ്ര ആഭ്യന്തര മന്ത്രാലയത്തിന്റെ അനുമതി ലഭിക്കാത്തതിനാൽ ഇന്ന് ബജറ്റ് അവതരിപ്പിക്കില്ലെന്ന് മുഖ്യമന്ത്രി അരവിന്ദ് കേജ്‍രിവാൾ സ്ഥിരീകരിച്ചു. ഇന്നു മുതൽ ഡോക്ടർമാർ ഉൾപ്പെടെ സർക്കാർ ജീവനക്കാർക്കും അധ്യാപകർക്കും ശമ്പളം ലഭിക്കാത്ത അവസ്ഥയുണ്ടാകുമെന്നും ഗുണ്ടായിസമാണെന്നും അദ്ദേഹം ആരോപിച്ചു. ഡൽഹി ബജറ്റ് അവതരണത്തിനു മുൻപു കേന്ദ്ര ആഭ്യന്തര മന്ത്രാലയത്തിന്റെ അനുമതി തേടേണ്ടതുണ്ട്. ഇന്നലെ വൈകിട്ടാണ് അനുമതി നിഷേധിച്ചുള്ള  കേന്ദ്രത്തിന്റെ കത്ത് സർക്കാരിനു ലഭിച്ചത്. എന്നാൽ കാരണം വ്യക്തമാക്കിയിട്ടില്ല.

എന്നാൽ, ചില വിവരങ്ങൾക്ക് കൃത്യമായ മറുപടി നൽകാത്തതിനാലാണു ബജറ്റ് അവതരണത്തിന് അനുമതി നിഷേധിച്ചതെന്നു കേന്ദ്ര ആഭ്യന്തര മന്ത്രാലയം. ബജറ്റുമായി ബന്ധപ്പെട്ട് 17ന് വിശദീകരണം സർക്കാരിൽ നിന്നു തേടിയിരുന്നു. മറുപടി ഇനിയും ലഭിച്ചിട്ടില്ലെന്നാണ് ലഫ്. ഗവർണറുടെ ഓഫിസ് പറയുന്നത്.