ന്യൂഡൽഹി ∙ കനത്ത മഴയിൽ ദിൽഷാദ് ഗാർഡനിലെ സ്കൂൾ മതിൽ ഇടിഞ്ഞുവീണതിനെ തുടർന്ന് 11 വാഹനങ്ങൾ തകർന്നു. മതിലിനു സമീപം നിർത്തിയിട്ടിരുന്ന വാഹനങ്ങളാണ് തകർന്നത്. ചില കാറുകൾ പൂർണമായും തകർന്നു. എസ്ജി പോക്കറ്റിലെ മുഖർജി സ്കൂളിന്റെ മതിലാണ് ഇടിഞ്ഞുവീണത്. മതിലിനോട് ചേർന്നുനിന്നിരുന്ന മരങ്ങളും കടപുഴകി വാഹനങ്ങൾക്കു മുകളിലേക്കു പതിച്ചു. 

എന്നാൽ, സംഭവത്തിൽ ആർക്കും പരുക്കേറ്റില്ലെന്നു ഡിസിപി രോഹിത് മീണ പറഞ്ഞു. ഇന്നലെ ഉച്ചയോടെയാണ് നഗരത്തിൽ പല ഭാഗത്തും കനത്ത മഴയും ശക്തമായ കാറ്റും വീശിയത്. വെസ്റ്റ് ഷാലിമാർ ബാഗ്, മോഡൽ ടൗൺ എന്നിവിടങ്ങളിലും മരങ്ങൾ ഒടിഞ്ഞുവീണു. ഡൽഹി– ഗുരുഗ്രം അതിർത്തി, മഥുര റോഡ് ഉൾപ്പെടെയുള്ള സ്ഥലങ്ങളിൽ വെള്ളക്കെട്ട് രൂപപ്പെട്ടതിനെ തുടർന്ന് ഗതാഗതം തടസ്സപ്പെട്ടു.