ന്യൂഡൽഹി ∙ നിലവിലുള്ള മദ്യനയത്തിന്റെ കാലാവധി 6 മാസത്തേക്കു കൂടി നീട്ടാൻ ഡൽഹി സർക്കാർ തീരുമാനിച്ചു. പുതിയ മദ്യനയം പ്രഖ്യാപിക്കുന്നതിന് സമയം ആവശ്യമായതിനാലാണ് കാലാവധി നീട്ടുന്നതെന്ന് അധികൃതർ വ്യക്തമാക്കി. 2024 മാർച്ച് 31വരെയാണ് ഇനിയുള്ള കാലാവധി. തീരുമാനത്തിനു ലഫ്.ഗവർണറുടെ അംഗീകാരം ലഭിച്ചിട്ടുണ്ട്. 

  ഇതുസംബന്ധിച്ചുള്ള വിജ്ഞാപനം എക്സൈസ് വകുപ്പ് ഇന്നു പുറപ്പെടുവിക്കും. ഇതിനു ശേഷം നിലവിലുള്ള മദ്യലൈസൻസുകൾ 6 മാസത്തേക്കു പുതുക്കി നൽകും. നിലവിലുള്ള മദ്യനയത്തിന്റെ കാലാവധി നാളെ അവസാനിക്കാനിരിക്കേയാണ് തീരുമാനം.   പുതിയ മദ്യനയത്തിന്റെ കരട് എക്സൈസ് വകുപ്പ് തയാറാക്കി നൽകിയിട്ടുണ്ടെങ്കിലും സർക്കാർ ഇക്കാര്യത്തിൽ അന്തിമ തീരുമാനമെടുത്തിട്ടില്ല.