റസ്റ്ററന്റിന് തീപിടിച്ച് 6 പേർക്ക് പരുക്ക്

ഐഎൻഎ∙ ഐഎൻഎ മാർക്കറ്റിലെ റസ്റ്ററന്റിലുണ്ടായ തീപിടിത്തത്തിൽ 6 പേർക്കു പരുക്കേറ്റു. മെട്രോ സ്റ്റേഷന്റെ 2–ാം നമ്പർ ഗേറ്റിനോട് ചേർന്ന കടയിലാണ് പുലർച്ചെ 3.15ന് തീപിടിത്തമുണ്ടായത്. തൊട്ടടുത്ത കടകളിലേക്കും തീ പടർന്നു. 2 മണിക്കൂറിന് ശേഷം തീയണയ്ക്കാനായെന്നു ഡൽഹി ഫയർ സർവീസ് അറിയിച്ചു. ചൈനീസ് ഫാസ്റ്റ് ഫുഡ് റസ്റ്ററന്റിൽ ഉറങ്ങിക്കിടന്ന ജീവനക്കാർക്കാണു പരുക്കേറ്റത്. പൊള്ളലേറ്റ സുനിൽ (46), ആഷ്കി നേപ്പാളി(26) എന്നിവരെ എയിംസിൽ പ്രവേശിപ്പിച്ചു. ആരുൺ (18), ശിവ(26), ശിവ് കുമാർ (24), ഗിരീഷ് (46) എന്നിവർ സഫ്ദർജങ് ആശുപത്രിയിലാണ്. ഷോർട്ട് സർക്യൂട്ടാണ് അപകടകാരണമെന്ന് പൊലീസ് പറഞ്ഞു.