ബൈക്കിലെത്തി പൊട്ടിച്ചെടുത്തത് പതിനഞ്ചരപ്പവൻ

പാലക്കാട് ∙ പ്രഭാത നടത്തത്തിനിടെ ബേക്കറി ഉടമയുടെ പത്തരപ്പവന്റെ സ്വർണമാല ബൈക്കിലെത്തിയ സംഘം കവർന്നു. പാലക്കാട് പട്ടിക്കര സുബ്രഹ്മണ്യപുരം നാരായണ എൻക്ലേവിലെ വി.സഹദേവന്റെ മാലയാണു നഷ്ടപ്പെട്ടത്. ഇന്നലെ രാവിലെ 6.45നാണു സംഭവം. സഹദേവൻ മോയൻസ് സ്കൂൾ ഭാഗത്തുനിന്നു മേൽപാലം ഇറങ്ങി വരുന്നതിനിടെ ബൈക്കിലെത്തിയ രണ്ടംഗ സംഘമാണു മാല പൊട്ടിച്ചെടുത്തു കടന്നത്. ഒരാൾ ഹെൽമറ്റ് ധരിച്ചിരുന്നെങ്കിലും ഒപ്പമുള്ളയാൾക്ക് ഹെൽമറ്റില്ല. നഗരത്തിലെ നാരായണ സ്വീറ്റ്സ് ബേക്കറി ഉടമയാണു സഹദേവൻ. സംഭവത്തിൽ ടൗൺ നോർത്ത് പൊലീസ് കേസെടുത്തു. 

ചീകോട് ബസ് കാത്തുനിന്ന യുവതിക്ക് നഷ്ടമായത് 5 പവന്റെ മാല 

ആലത്തൂർ ∙ ബൈക്കിലെത്തിയ രണ്ടു പേർ ബസ് കാത്തു നിൽക്കുകയായിരുന്ന യുവതിയുടെ കഴുത്തിൽനിന്ന് 5 പവന്റെ മാല പൊട്ടിച്ചെടുത്തു. ഇരട്ടക്കുളം ചീകോട് പയ്യക്കുണ്ട് പ്രജീഷിന്റെ ഭാര്യ റീജയുടെ (24) മാലയാണു നഷ്ടപ്പെട്ടത്. ദേശീയപാത ചീകോട് ബസ് സ്റ്റോപ്പിൽ കഴിഞ്ഞദിവസം വൈകിട്ട് 3നാണു സംഭവം. പൊലീസ് അന്വേഷണം ആരംഭിച്ചു.