ചപ്പക്കാട്ട് കാണാതായ യുവാവിന്റെ സഹോദരൻ മരിച്ച നിലയിൽ

മുതലമട ∙ ചപ്പക്കാടുനിന്ന് ഒരു വർഷം മുൻപു കാണാതായ സാമുവലിന്റെ(സ്റ്റീഫൻ) സഹോദരൻ ജോയൽരാജിനെ(ജോൺ–30) വീടിനടുത്തുള്ള ഓലക്കുടിലിൽ മരിച്ച നിലയിൽ കണ്ടെത്തി. തിങ്കളാഴ്ച രാവിലെയാണു മരിച്ച നിലയിൽ കണ്ടെത്തിയത്. നാട്ടുകാർ വിവരമറിയിച്ചതിനെത്തുടർന്നു കൊല്ലങ്കോട് പൊലീസ് സ്ഥലത്തെത്തി. ഇൻക്വസ്റ്റിനു ശേഷം മൃതദേഹം പാലക്കാട് ജില്ലാ ആശുപത്രിയിലെത്തിച്ചു പോസ്റ്റ്മോർട്ടം നടത്തി. ന്യുമോണിയ ബാധിച്ചതാണു മരണ കാരണമെന്നു പോസ്റ്റ്മോർട്ടത്തിൽനിന്ന് അറിഞ്ഞതായി പൊലീസ് പറഞ്ഞു. 

ജോണിനു പനി ഉണ്ടായിരുന്നതായി പൊലീസിനു വിവരം ലഭിച്ചു. കഴിഞ്ഞ വർഷം ഓഗസ്റ്റ് 30നാണു ജോണിന്റെ സഹോദരൻ സ്റ്റീഫനെയും സുഹൃത്ത് മുരുകേശനെയും കോളനിയിൽനിന്നു കാണാതായത്. അന്വേഷണത്തിനിടെ ഇവരുടെ അച്ഛൻ ശബരിമുത്തുവും മരിച്ചിരുന്നു. അമ്മ: പാപ്പാത്തി. സഹോദരൻ: രാജു.