ഇരട്ടക്കുട്ടികളെന്ന സന്തോഷം; എഴുവന്തലയുടെ സൗഭാഗ്യം
Mail This Article
ചെർപ്പുളശ്ശേരി ∙ ഇരട്ടക്കുട്ടികൾ ക്ലാസ് മുറികൾ കയ്യടക്കിയ വിസ്മയക്കാഴ്ചയുമായി നെല്ലായ പഞ്ചായത്തിലെ എഴുവന്തല ഈസ്റ്റ് എഎംഎൽപി സ്കൂൾ. സ്കൂളിലെ എൽകെജി ക്ലാസിൽ നാല് ജോഡി ഇരട്ടക്കുട്ടികൾ പഠിക്കുമ്പോൾ 1, 2, 3 ക്ലാസുകളിൽ ഓരോ ജോഡി വീതം ഇരട്ടകളും പഠിക്കുന്നു. ആകെ 7 ജോഡി കുട്ടികളുടെ അപൂർവ സംഗമമാണ് നിത്യവും സ്കൂളിൽ.
വിദ്യാലയത്തിൽ പ്രവേശനോത്സവ സമയത്ത് 6 ജോഡി ഇരട്ടകളാണ് ഉണ്ടായിരുന്നത്. ഒരാഴ്ച മുൻപാണ് ഇരട്ടകളായ മുഹമ്മദ് അമാനും ആലിയയും സ്കൂളിൽ പഠനത്തിന് എത്തിയത്. ഇതോടെയാണ് സ്കൂളിന് 7 ജോഡി ഇരട്ടക്കുട്ടികളായത്. അക്ഷിത-അർവിത, മുഹമ്മദ് ഹാദി-ഹന ഫാത്തിമ, റൈമ ഫാത്തിമ-റോഹി ഫാത്തിമ, മുഹമ്മദ് അയാൻ-മുഹമ്മദ് അദിയാൻ, ഉവൈസ് അഹമ്മദ്-ജുനൈദ് അഹമ്മദ്, മുഹമ്മദ് സഹൽ-മുഹമ്മദ് സുഹൈൽ എന്നിവരാണ് മറ്റ് ഇരട്ടകൾ.സ്കൂളിലെ രക്ഷിതാക്കളായ രണ്ട് അമ്മമാർ ഈയിടെ ജന്മം നൽകിയിരിക്കുന്നതും ഇരട്ടകളെയാണെന്നും ഇതു വലിയ സന്തോഷമാണ് ഉണ്ടാക്കുന്നതെന്നും പ്രധാനാധ്യാപകൻ എം.ബാബുരാജ് പറഞ്ഞു.