വാളയാർ ∙ ശമ്പളക്കുടിശിക ആവശ്യപ്പെട്ടതിന്റെ പേരിൽ മുൻ തൊഴിലാളിയെ തട്ടിക്കൊണ്ടു പോയി മർദിച്ച്, തോക്ക്‌ ചൂണ്ടി കൊലപ്പെടുത്തുമെന്നു ഭീഷണിപ്പെടുത്തി വഴിയോരത്തു തള്ളിയിട്ട കേസിൽ മുഖ്യപ്രതിയെ വാളയാർ പൊലീസ് അറസ്റ്റ് ചെയ്തു. വണ്ടിത്താവളം മുജീബ് റഹ്മാൻ (44) ആണ് അറസ്റ്റിലായത്.

കഴിഞ്ഞ ഏപ്രിൽ ഏഴിനാണു അട്ടപ്പാടി അഗളി സ്വദേശിയായ പ്രജീഷിനെ മുൻ കമ്പനി ഉടമയായ മുജീബ് റഹ്മാന്റെ നേതൃത്വത്തിലുള്ള ഏഴംഗ സംഘം കാറിൽ തട്ടിക്കൊണ്ടു പോയി മർദിച്ച്‌ റോഡിൽ തള്ളിയിട്ടത്. ശമ്പളക്കുടിശിക ആവശ്യപ്പെട്ടതിനെ തുടർന്നുള്ള വൈരാഗ്യമാണു ആക്രമണത്തിനു കാരണമെന്നു പൊലീസ്‌ കണ്ടെത്തിയിരുന്നു. കേസിൽ പ്രതികളായ ആറു പേരെ പിന്നീട് പൊലീസ് അറസ്റ്റ് ചെയ്തിരുന്നു. കോടതിയിൽ ഹാജരാക്കിയ മുജീബിനു ജാമ്യം അനുവദിച്ചു.