പീഡനക്കേസ് വിസ്താരത്തിനിടെ അതിജീവിത കുഴഞ്ഞുവീണു; ചികിത്സയും സുരക്ഷയും ഒരുക്കി കോടതിയും പൊലീസും
Mail This Article
മണ്ണാർക്കാട് ∙ പീഡനക്കേസ് വിസ്താരത്തിനിടെ അതിജീവിത കോടതിയിൽ കുഴഞ്ഞു വീണു. കോടതി നിർദേശപ്രകാരം ചികിത്സ നൽകിയ ശേഷം പൊലീസ് വീട്ടിലെത്തിച്ചു. കൊല്ലങ്കോട് പൊലീസ് റജിസ്റ്റർ ചെയ്ത പീഡനക്കേസിന്റെ വിസ്താരത്തിനിടെ മണ്ണാർക്കാട് പട്ടികജാതി പട്ടിക വർഗ പ്രത്യേക കോടതിയിൽ ഇന്നലെ വൈകിട്ട് അഞ്ചിനായിരുന്നു സംഭവം.
പബ്ലിക് പ്രോസിക്യൂട്ടർ പി.ജയന്റെ ചീഫ് വിസ്താരം കഴിഞ്ഞ ശേഷം പ്രതിഭാഗം അഭിഭാഷകൻ വിസ്താരം തുടരുന്നതിനിടെ ഇവർ കുഴഞ്ഞു വീഴുകയായിരുന്നു. ജഡ്ജി കെ.എം.രതീഷ്കുമാർ ഇവരെ ഉടൻ ആശുപത്രിയിൽ എത്തിച്ചു ചികിത്സ നൽകാനും സുരക്ഷിതമായി വീട്ടിലെത്തിക്കാനും മണ്ണാർക്കാട് ഡിവൈഎസ്പിയുടെ ചുമതലയുള്ള അഗളി ഡിവൈഎസ്പി എൻ.മുരളീധരനു നിർദേശം നൽകി.
രക്തസമ്മർദം കുറഞ്ഞതിനെത്തുടർന്നാണു കുഴഞ്ഞുവീണത്. താലൂക്ക് ആശുപത്രിയിൽ എത്തിച്ചു ചികിത്സ നൽകി. ഡിവൈഎസ്പി സ്വന്തം ചെലവിൽ ടാക്സി വാഹനം ഏർപ്പെടുത്തി വീട്ടിലെത്തിക്കുകയായിരുന്നു.
