ജ്വല്ലറിയിൽ ഓഹരി വാഗ്ദാനം ചെയ്തു തട്ടിപ്പ്; യുവാവ് അറസ്റ്റിൽ

നെന്മാറ ∙ നെന്മാറ സ്വദേശിയിൽ നിന്ന് 7 ലക്ഷം രൂപ തട്ടിയെടുത്ത കേസിൽ കണ്ണൂർ സ്വദേശിയായ യുവാവ് അറസ്റ്റിൽ. കണ്ണൂർ മട്ടന്നൂർ അവുക്കുഴിയിൽ വീട്ടിൽ നിയാസ് (25) ആണ് പിടിയിലായത്. നെന്മാറ കോക്കോട് വീട്ടിൽ സുരേഷ്കുമാറിന്റെ പണമാണു നഷ്ടപ്പെട്ടത്.  തൃശൂരിലെ സ്വകാര്യ ജ്വല്ലറിയിലെ പങ്കാളിത്ത ഓഹരി നൽകാമെന്നു തെറ്റിദ്ധരിപ്പിച്ച് ഒക്ടോബർ 6നു സുരേഷ് കുമാറിൽ നിന്നു പണം വാങ്ങി കബളിപ്പിക്കുകയായിരുന്നു. വിവിധ ജില്ലകളിലായി ഒട്ടേറെപ്പേരെ സമാനരീതിയിൽ തെറ്റിദ്ധരിപ്പിച്ചു 2 കോടിയോളം രൂപ തട്ടിയ കേസുകൾ നിയാസിന്റെ പേരിലുണ്ടെന്നു പൊലീസ് പറഞ്ഞു. തൃശൂർ കൊരട്ടിയിൽ നിന്നു സബ് ഇൻസ്പെക്ടർ എംസി.ഗോപകുമാറിന്റെ നേതൃത്വത്തിലുള്ള പൊലീസ് സംഘമാണു പ്രതിയെ പിടികൂടിയത്.