പാലക്കാട്∙ ലോറിയിൽ നിന്ന് ആശുപത്രി മാലിന്യം റോഡിൽ വീഴുന്നത് അധികൃതരെ അറിയിച്ചയാൾക്കു പാരിതോഷികം. ലോറിയിൽ ആശുപത്രി മാലിന്യം കൊണ്ടുപോകുമ്പോൾ അകമലവാരം - മലമ്പുഴ റോഡിൽ വിവിധ ഭാഗങ്ങളിൽ വീണതിനെ തുടർന്നു വാഹനം തടഞ്ഞു നിർത്തുകയും വിവരം മലമ്പുഴ പഞ്ചായത്ത് വിജിലൻസ് സ്ക്വാഡിനെ അറിയിക്കുകയും ചെയ്തയാൾക്കാണു മലമ്പുഴ പഞ്ചായത്തിൽ നിന്ന് 2500 രൂപ പാരിതോഷികം നൽകിയത്.

വിജിലൻസ് സ്ക്വാഡ് ലോറിയിൽ ഉള്ളവരെക്കൊണ്ടു തന്നെ മാലിന്യം വൃത്തിയാക്കുകയും പിഴയായി 40,000 രൂപ ഈടാക്കുകയും ചെയ്തു. മാലിന്യം തള്ളുന്നതിനെതിരെ കർശന നടപടി തുടരുമെന്നും ഹെൽത്ത് ഇൻസ്‌പെക്ടർ പി.ഉദയകുമാർ അറിയിച്ചു. വിജിലൻസ് സ്ക്വാഡ് അംഗങ്ങളായ ജൂനിയർ ഹെൽത്ത് ഇൻസ്പെക്ടർ ബി.എസ്.ശശാങ്കൻ, പഞ്ചായത്ത് ഉദ്യോഗസ്ഥരായ റിഷിൽ, വിഷ്ണു എന്നിവർ പരിശോധനയിൽ പങ്കെടുത്തു.