വാൽപാറയിലെ തോട്ടങ്ങളിൽ വീണ്ടും കാട്ടാന

വാൽപാറ∙ തേയിലത്തോട്ടങ്ങളിൽ വീണ്ടും കാട്ടാനകൾ ഇറങ്ങി. രാത്രി റേഷൻ കടകൾക്കു നേരെ ആക്രമണം അഴിച്ചുവിട്ടതിനാൽ തൊഴിലാളികൾ ഭീതിയിലാണ്. തേയിലത്തോട്ടങ്ങളിൽ പതിവായി കാട്ടാനകൾ എത്തുന്നുണ്ട്. കഴിഞ്ഞ ദിവസം ആനമുടി എസ്റ്റേറ്റിലെത്തിയ കാട്ടാനകൾ ഇല നുള്ളാനെത്തിയ തൊഴിലാളികളെ വിറപ്പിച്ചു. രണ്ടു മണിക്കൂറോളം കിണഞ്ഞു ശ്രമിച്ചാണ് വനം ഉദ്യോഗസ്ഥർ ഇവയെ കാടുകയറ്റിയത്. രാത്രിയായപ്പോൾ ഇവ വീണ്ടും എസ്റ്റേറ്റിലെത്തി റേഷൻ കട പൂർണമായി തകർത്തു. കടയിലുണ്ടായിരുന്ന സാധനങ്ങൾ ഭക്ഷിച്ച ശേഷമാണ് ആനകൾ സ്ഥലം വിട്ടത്.