മുതലമട ∙ തമിഴ്നാട് അതിർത്തിയോടു ചേർന്നു കിടക്കുന്ന തോട്ടങ്ങളിൽ കാട്ടാനയിറങ്ങി കൃഷി നശിപ്പിച്ചതിനൊപ്പം വൈദ്യുത തൂണുകളും നശിപ്പിച്ചു. ചെമ്മണാംപതി അരസുമരത്തുക്കാട്ടിൽ  പെരിയസ്വാമി–മീനാക്ഷി ദമ്പതികളുടെ തോട്ടത്തിലെ തെങ്ങുകളും കവുങ്ങുകളുമാണു കാട്ടാന നശിപ്പിച്ചത്. തെങ്ങുകൾ തള്ളിയിട്ടതു വൈദ്യുതി ലൈനിലേക്കു വീണതിനെ തുടർന്നു 5 വൈദ്യുതി തൂണുകൾ നശിച്ചു. ഇതിൽ 4 വൈദ്യുതി തൂണുകൾ പൊട്ടിപ്പോയിട്ടുണ്ട്. ഒരെണ്ണം വീഴുകയും ചെയ്തു.

ഇതോടെ ഈ പ്രദേശത്തേക്കുള്ള വൈദ്യുതി വിതരണത്തിൽ തടസ്സം നേരിട്ടു. മുതലമട പഞ്ചായത്ത് അധ്യക്ഷ പി.കൽപനാദേവി, ഉപാധ്യക്ഷൻ എം.താജുദ്ദീൻ എന്നിവർ സ്ഥലത്തെത്തി. മുതലമടയിലെ കെഎസ്ഇബി അധികൃതർ അധികൃതർ സ്ഥലത്തെത്തി വൈദ്യുതി തൂണുകൾ പുനഃസ്ഥാപിക്കാനുള്ള ശ്രമത്തിലാണ്.  വൈദ്യുതി വിതരണം ഇന്നു പൂർണമായും പുനഃസ്ഥാപിക്കും.