വാഹനാപകടം: മൂന്നു പേർക്ക് പരുക്ക്

കുഴൽമന്ദം ∙ മാത്തൂർ അഗ്രഹാരത്തിനു സമീപം കാറും ഓട്ടോയും ഇടിച്ചുണ്ടായ വാഹനാപകടത്തിൽ മൂന്നുപേർക്ക് പരുക്കേറ്റു.  ഓട്ടോയാത്രികരായ കണ്ണനൂർ സ്വദേശികളായ രാധാകൃഷ്ണൻ (55), ഭാര്യ സബിത (45), ഓട്ടോ ഡ്രൈവർ പല്ലഞ്ചാത്തനൂർ സ്വദേശി ജയകൃഷ്ണൻ (56) എന്നിവർക്കാണ് പരുക്കേറ്റത്. ഇവരെ കുഴൽമന്ദം ഗവ.ആശുപത്രിയിൽ  പ്രവേശിപ്പിച്ചു. പരുക്ക് ഗുരുതരമല്ല. ഇന്നലെ ഉച്ചയ്ക്കു രണ്ടരയോടെയാണ്  അപകടം.    ചുങ്കമന്ദം ഭാഗത്തുനിന്നും കോട്ടായി ഭാഗത്തേക്കു പോവുകയായിരുന്ന ഓട്ടോയും ചൂലനൂരിൽ നിന്നു ചുങ്കമന്ദം ഭാഗത്തേക്കു പോവുകയായിരുന്ന  കാറുമാണ് അപകടത്തിൽപെട്ടത്. ഇടിയുടെ ആഘാതത്തിൽ ഓട്ടോയുടെ പിൻവശത്തെ ഒരു ടയർ ഊരിത്തെറിച്ചു.