തീർഥാടകരുടെ തിരക്ക് തുടരുന്നു; ശബരിമല നട നാളെ അടയ്ക്കും

ശബരിമല ∙ കുംഭമാസ പൂജ പൂർത്തിയാക്കി അയ്യപ്പ ക്ഷേത്ര നാളെ അടയ്ക്കും. മകരവിളക്ക് കാലത്തെ പോലെ തീർഥാടകരുടെ വൻതിരക്കായിരുന്നു ഇന്നലെയും. പതിനെട്ടാംപടി കയറാനും ദർശനത്തിനും മണിക്കൂറുകൾ നീണ്ട കാത്തുനിൽപ്പായിരുന്നു. ലക്ഷാർച്ചനയും കളഭാഭിഷേകവും ആയിരങ്ങൾ കണ്ടു തൊഴുതു. തന്ത്രി കണ്ഠര് മഹേഷ് മോഹനരുടെ കാർമികത്വത്തിൽ ലക്ഷാർച്ചനയുടെയും കളഭാഭിഷേകത്തിന്റെയും ബ്രഹ്മകലശങ്ങൾ ഒരുമിച്ചു പൂജിച്ചു നിറച്ചു. തുടർന്നു ലക്ഷാർച്ചന തുടങ്ങി. ഉച്ചയോടെ പൂർത്തിയായി.

ആദ്യം ലക്ഷാർച്ചനയുടെ ബ്രഹ്മകലശത്തിലെ ഭസ്മം അയ്യപ്പ വിഗ്രഹത്തിൽ അഭിഷേകം ചെയ്തു. പിന്നെ കളഭാഭിഷേകം നടന്നു. ഇന്നു സഹസ്രകലശ പൂജ, പടിപൂജ, ഉദയാസ്തമനപൂജ എന്നിവ ഉണ്ട്. നാളെ രാത്രി 10ന് നട അടയ്ക്കും. വൈകിട്ട് 6 വരെ അയ്യപ്പന്മാർക്ക് പമ്പയിൽ നിന്നു സന്നിധാനത്തേക്ക് പ്രവേശനമുള്ളൂ. തമിഴ്നാട്ടിലെ നേരൂർ ആശ്രമം മഠാധിപതി വിദ്യാ ശങ്കര സരസ്വതി സ്വാമി ഇന്നലെ അയ്യപ്പ ദർശനം നടത്തി. ലക്ഷാർച്ചനയിലും കളഭാഭിഷേക ചടങ്ങിലും പങ്കെടുത്തു.