കോവിഡിന്റെ വരവോടെ വിവാഹം മാറ്റി, പരീക്ഷയും; പിന്നെ രണ്ടും ഒന്നിച്ചെത്തി...

കോഴഞ്ചേരി ∙ കതിർമണ്ഡപത്തിൽ നിന്ന് ഒരു മിനിറ്റുപോലും കളയാതെ ആര്യ പാഞ്ഞെത്തിയത് പരീക്ഷാ ഹാളിലേക്ക്. എംജി സർവകലാശാല ഇന്നലെ പുനരാരംഭിച്ച 6–ാം സെമസ്റ്റർ ബികോം പരീക്ഷ എഴുതുന്നതിനാണ് വിവാഹ വേഷത്തിൽ ആര്യ സെന്റ് തോമസ് കോളജിലെ പരീക്ഷ ഹാളിൽ എത്തിയത്. പരീക്ഷാ ഹാളിന് പുറത്ത് വരനും കാത്തിരിപ്പുണ്ടായിരുന്നു. കോളജിലെ മൂന്നാം വർഷ ബികോം വിദ്യാർഥിനിയും കൊടുമൺ ചരുവിള പുത്തൻ വീട്ടിൽ രവീന്ദ്രന്റെ മകളുമാണ് ആർ. ആര്യ.അങ്ങാടിക്കൽ സ്വദേശി അനിൽ കുമാറുമായുള്ള വിവാഹം ഏപ്രിൽ 5ന് ആണ് നിശ്ചയിച്ചിരുന്നത്.

കോവിഡിന്റെ വരവോടെ വിവാഹം ജൂൺ ഒന്നിലേക്ക് മാറ്റുകയായിരുന്നു. സർവകലാശാല മാറ്റിവച്ച പരീക്ഷ ആദ്യം മേയ് അവസാനം നടക്കുമെന്ന് അറിയിച്ചു. പിന്നീട് ലോക്ഡൗൺ നീട്ടിയതോടെ പരീക്ഷ ജൂൺ ഒന്നിലേക്ക് മാറ്റി. അങ്ങനെ കല്യാണവും പരീക്ഷയും ഒരുദിവസം എത്തി. കല്യാണം കൊടുമൺ വൈകുണ്ഠപുരം ക്ഷേത്രത്തിൽ 12നും 12.30നും ഉള്ള മുഹൂർത്തത്തിൽ നടന്നു. 1.15ന് പരീക്ഷ ഹാളിൽ എത്തേണ്ടതിനാൽ കല്യാണ സദ്യപോലും കഴിക്കാതെയാണ് ആര്യ വരനുമൊത്ത് കോളജിലേക്ക് എത്തിയത്.