വില്ലേജ് ഓഫിസിന് മുന്നിൽ വെള്ളക്കെട്ട്

കുന്നന്താനം ∙ വില്ലേജ് ഓഫിസിനു മുന്നിലെ വെള്ളക്കെട്ട് പൊതുജനങ്ങൾക്കും ജീവനക്കാർക്കും ദുരിതമായി. ചെങ്ങരൂർച്ചിറ–മുക്കൂർ–നെടുങ്ങാടപ്പള്ളി റോഡിന്റെ നവീകരണത്തിനുശേഷമാണ് വില്ലേജ് ഓഫിസ് പരിസരത്ത് വെള്ളക്കെട്ട് രൂക്ഷമായത്. റോഡിൽ കൂടി ഒഴുകിയെത്തുന്ന വെള്ളവും കെട്ടിടത്തിൽനിന്നുള്ള വെള്ളവും കൂടിയാകുമ്പോൾ കുളത്തിനു സമാനമാകും. 

മണിക്കൂറുകൾ കഴിഞ്ഞാൽ മാത്രമേ വെള്ളം പൂർണമായും നീങ്ങുകയുള്ളൂ. വെള്ളത്തിനുള്ളിൽ നിരത്തിയിരിക്കുന്ന സിമന്റ് കട്ടകളിൽ ചവിട്ടിയാണ് ഓഫിസിലേക്ക് കയറുന്നത്. ശ്രദ്ധ തെറ്റിയാൽ വീണു പരുക്കേൽക്കാം. സിമന്റ് കട്ടയിലൂടെ നടക്കാനറിയാത്തവർക്ക് വെള്ളത്തിൽ ചവിട്ടുന്നതിനാൽ ഓഫിസിനുള്ളിലും വൃത്തിഹീനമാകുന്ന സ്ഥിതിയാണ്. റോഡിനെക്കാൾ താഴ്ന്നുകിടക്കുന്നതിനാൽ കെട്ടിടത്തിന്റെ മുറ്റം ഉയർത്തിയാൽ മാത്രമേ പ്രശ്നത്തിനു പരിഹാരമാകുകയുള്ളൂ.