എന്നു തീരും ഈ പാലം ‘പണി’ ചെട്ടിയാരഴികത്ത് പാലം നിർമാണം നീളുന്നു

മണ്ണടി ∙ ചെട്ടിയാരഴികത്ത് പാലത്തിന്റെ നിർമാണ ജോലികൾ നീളുന്നു. 2019 ജൂലൈ 29 ന് നിർമാണോദ്ഘാടനം നടന്നെങ്കിലും മാസങ്ങൾ കഴിഞ്ഞാണ് നിർമാണ ജോലികൾ തുടങ്ങിയത്. പാലത്തിന്റെ രൂപകൽപനയിലുൾപ്പെടെ കാലതാമസം നേരിട്ടിരുന്നു. 2021 ജൂലൈ 28 ന് നിർമാണം പൂർത്തിയാക്കാനാണ് ലക്ഷ്യമിട്ടത്.ഇതിനിടയിൽ ലോക്ഡൗണും പ്രളയവും കടന്നു വന്നു.ഇതുവരെ രണ്ടു തൂണുകൾ, ഇരു ഭാഗത്തെയും അബട്ട്മെന്റ്, രണ്ടാമത്തെ തൂൺ വരയുള്ള ബീം എന്നിവയുടെ നിർമാണം പൂർത്തിയായി. തെക്കു ഭാഗത്തുള്ള അബട്ട്മെന്റിലേക്ക് ബീം നിർമിക്കാനുള്ള ജോലികൾ തുടരുന്നു. ഇതിനു ശേഷം സ്പാനുകൾ സ്ഥാപിച്ച് സമീപന പാതകളുടെ നിർമാണവും പൂർത്തീകരിച്ചെങ്കിൽ മാത്രമേ പാലം ഗതാഗത യോഗ്യമാവുകയുള്ളൂ. മഴക്കാലമായതോടെ ആറ്റിൽ ജലപ്രളയമുണ്ടായാൽ പാലത്തിന്റെ നിർമാണം പൂർത്തിയാക്കാൻ ഇനിയും മാസങ്ങൾ വേണ്ടി വരും.