കുറ്റൂർ ∙ പഞ്ചായത്തിലെ തെങ്ങേലി-മുണ്ടടിച്ചിറ പൊതുമരാമത്ത് റോഡിന്റെ വശത്ത് ഇറക്കിയിട്ടിരിക്കുന്ന മെറ്റൽ കൂന അപകടത്തിനിടയാക്കുന്നു. തെങ്ങേലി ശ്രീകൈലാസനാഥ ക്ഷേത്രത്തിനു സമീപമാണ് റോഡിന്റെ പകുതിയോളം ഭാഗത്തായി മെറ്റൽ ഇറക്കിയിട്ടിരിക്കുന്നത്.

മൂന്നു മാസമായി ഇവിടെയിട്ടിരിക്കുന്ന മെറ്റൽ ജലജീവൻ മിഷൻ പദ്ധതിയിൽ റോഡിൽ എടുത്ത കുഴിയുടെ മുകൾഭാഗം കോൺക്രീറ്റ് ചെയ്യാൻ ഇറക്കിയതാണ്. 

ഇപ്പോൾ മെറ്റൽ റോഡിൽ‌ നിരന്നുകിടക്കുന്ന നിലയിലാണ്. ഇതോടെ ഇരുചക്രവാഹനക്കാരും കാൽനടയാത്രക്കാരും നിരന്തരം അപകടത്തിൽപ്പെടുന്നതായാണ് പരാതി. റോഡിൽ നിരന്നുകിടക്കുന്ന മെറ്റലിൽ വാഹനങ്ങൾ തെന്നിമാറുന്നതാണ് അപകടത്തിനു കാരണം.ഇവിടെ ഇരുചക്രവാഹനം തെന്നി വീണ് പുളിക്കീഴ് ശാരോൺ വില്ലയിൽ ചാൾസിന് (40) കാലിനു പൊട്ടലുണ്ടായി.