അള്ളുങ്കലിന് സമീപം കാട്ടാന കൃഷി നശിപ്പിച്ചു

സീതത്തോട് ∙ അള്ളുങ്കലിന് സമീപം കാട്ടാന കൃഷി നശിപ്പിച്ചു. ഫിലിപ് വില്ലയിൽ മാത്യു ഫിലിപ്, പുന്നത്തുണ്ടിൽ അച്ചൻമോൻ എന്നിവരുടെയും മൂന്നുകല്ല് സിയോൻ മാർത്തോമ്മാ പള്ളിയുടെ സ്ഥലത്തെയും വാഴ, തെങ്ങ്, റബർ എന്നിവയാണ് നശിപ്പിച്ചത്. മാത്യു ഫിലിപ്പിന്റെ വീടിന് സമീപം വരെ എത്തിയാണ് കാട്ടാന നാശം വരുത്തിയത്. ജനവാസ മേഖലയ്ക്ക് അടുത്ത് വരെ കാട്ടാനയെത്തിയതോടെ ഭീതിയിലാണ് കുടുംബങ്ങൾ. കഴിഞ്ഞ ഒരാഴ്ചയായി മേഖലയിൽ കാട്ടാനയുടെ സാന്നിധ്യം സജീവമാണ്. ഒരു മാസത്തിനുള്ളിൽ ഒട്ടേറെ കർഷകരുടെ കൃഷി നശിപ്പിച്ചു.