പുതുശേരി ∙ കാൽപന്തുകളിയിൽ പെൺകുട്ടികളുടെ പുതിയ തലമുറയെ വാർത്തെടുക്കാൻ പുതുശേരി എംജിഡി ഹൈസ്കൂൾ. ഉപജില്ലാ തലത്തിലും ജില്ലാ തലത്തിലും മികവുകാട്ടിയാണ് ഈ സ്കൂളിലെ കുട്ടികൾ വരവറിയച്ചത്. സ്കൂളിലെ നാലു പെൺകുട്ടികൾ സംസ്ഥാന സ്കൂൾ ഗെയിംസിൽ ജില്ലയുടെ ജഴ്സി അണിയും. ഐറിൻ മനോജ്, ക്രിസ്റ്റീന ജോജി, ഷൈബി കെ. മാത്യു, ഷെബി എൽസാ സാബു എന്നിവരാണിവർ. പ്രഥമാധ്യാപിക അന്നമ്മ ജയിംസിന്റെ നേതൃത്വത്തിൽ അധ്യാപകരും പിടിഎയും നാട്ടുകാരും ഇവർക്ക് വേണ്ട പ്രോൽസാഹനം നൽകുന്നുണ്ട്. അധ്യാപകരായ ക്രിസ്റ്റീൻ ഷാജി, സജു പി. തോമസ്, അനു സൂസൻ എന്നിവരാണ് കുട്ടികളെ സ്കൂൾ ഗെയിംസിനായി പരിശീലിപ്പിക്കുന്നത്. കഴിഞ്ഞ മധ്യവേനൽ അവധിക്കാലത്ത് ജില്ലാ ഫുട്ബോൾ അസോസിയേഷന്റെ നേതൃത്വത്തിൽ ഒന്നരമാസക്കാലം ഇവിടെ ഫുട്ബോൾ താരങ്ങൾക്ക് പരിശീലനം നൽകിയിരുന്നു.