ശബരിമല ∙ തീർഥാടന പാതയിൽ യാത്രാ തടസ്സമായി മണ്ണുമാന്തി യന്ത്രം. ശബരിമല മാസ്റ്റർ പ്ലാൻ പദ്ധതിയിൽ ലക്ഷങ്ങൾ മുടക്കി വാങ്ങിയ വലിയ കൂടിയ എസ്കവേറ്റർ ആണിത്. മരക്കൂട്ടത്ത് സ്വാമി അയ്യപ്പൻ റോഡിലാണ് ഒരു വർഷമായി ഇത് കിടക്കുന്നത്. മഴയും വെയിലുമേറ്റ്  തുരുമ്പിച്ചു തുടങ്ങി. ഇത് സുരക്ഷിതമായ സ്ഥാനത്തേക്ക് മാറ്റാൻ ദേവസ്വം ബോർഡ് ഇനിയും തയാറായിട്ടില്ല.

മരക്കൂട്ടത്ത് അടിപ്പാതയോട് ചേർന്ന ഭാഗത്താണ് ഇത് ഇട്ടിരിക്കുന്നത്. സ്വാമി അയ്യപ്പൻ റോഡിലൂടെ സന്നിധാനത്തേക്കും തിരിച്ചും തീർഥാടകർ ഇതുവഴി വരുന്നുണ്ട്. ഇതിനു പുറമേ സന്നിധാനത്തേക്ക് ആവശ്യമായ സാധനങ്ങൾ ട്രാക്ടറിലാണ് എത്തിക്കുന്നത്.  ട്രാക്ടറിന്റെ യാത്രയ്ക്കും മണ്ണുമാന്തി യന്ത്രം തടസ്സമാണ്.