ആസക്തികൾക്കെതിരെയുള്ള പോരാട്ടം ക്രൈസ്തവ ദൗത്യം: മാർ റാഫേൽ തട്ടിൽ

മാരാമൺ ∙ ആസക്തികൾക്കെതിരെയുള്ള പോരാട്ടമാണ് ക്രൈസ്തവ ദൗത്യമെന്ന് സീറോ മലബാർ സഭ മേജർ ആർച്ച് ബിഷപ് മാർ റാഫേൽ തട്ടിൽ. 130-ാം മാരാമൺ കൺവൻഷനിൽ ഇന്നലെ നടന്ന ലഹരി വിമോചന യോഗത്തിൽ മുഖ്യസന്ദേശം നൽകുകയായിരുന്നു അദ്ദേഹം. കുടുംബങ്ങളിൽ നിന്നു ലഹരി എന്ന പിശാചിനെ പുറത്താക്കേണ്ടത് അനിവാര്യമാണ്. കുടുംബങ്ങളിൽ മാത്രമല്ല സമൂഹത്തിനും പരിവർത്തനം ആവശ്യമാണ്.

കുടുംബങ്ങൾക്ക് കൂട്ടായ്മയുടെ അനുഭവമായി മാറി ദേവാലയങ്ങളാകാൻ കഴിയണം. ദൈവഹിതത്തിനു വിരുദ്ധമായി ആഘോഷങ്ങൾ അവസാനിപ്പിക്കണം. നമ്മുടെ ആഘോഷങ്ങളിൽ മിതത്വം പാലിക്കേണ്ടത് അനിവാര്യമാണ്. സാമൂഹിക പ്രതിബദ്ധതയോടെ ദൈവരാജ്യ പ്രവർത്തനങ്ങളിൽ പങ്കാളികളാകാൻ നമുക്ക് കഴിയണം – അദ്ദേഹം പറഞ്ഞു. മാർത്തോമ്മാ ലഹരി വിമോചന സമിതി പ്രസിഡന്റ് ഡോ. ജോസഫ് മാർ ബർന്നബാസ് സഫ്രഗൻ മെത്രാപ്പൊലീത്ത അധ്യക്ഷത വഹിച്ചു. സഞ്ചാര സെക്രട്ടറി റവ. ജിജി വർഗീസ് പ്രസ്താവന നടത്തി.