കുംഭമാസപ്പുലരിയിൽ ശബരിമലയിൽ തിരക്ക്

ശബരിമല ∙ കുംഭമാസ പൂജയ്ക്കായി നട തുറന്നപ്പോൾ‍ ശബരിമലയിൽ ദർശനത്തിനു വലിയ തിരക്ക്. പുലർച്ചെ മുതൽ ദർശനത്തിനു നല്ല തിരക്കായിരുന്നു. തന്ത്രി കണ്ഠര് രാജീവരുടെ കാർമികത്വത്തിൽ ഗണപതി ഹോമത്തോടെയാണു പൂജ തുടങ്ങിയത്. തന്ത്രി കണ്ഠര് ബ്രഹ്മദത്തന്റെ കാർമികത്വത്തിൽ കളഭാഭിഷേകം നടന്നു. കിഴക്കേ മണ്ഡപത്തിൽ പൂജിച്ചു ചൈതന്യം നിറച്ച ബ്രഹ്മകലശം വാദ്യമേളങ്ങളോടെ ആഘോഷമായാണ് ശ്രീകോവിലിൽ എത്തിച്ചത്. തുടർന്ന് തന്ത്രി അയ്യപ്പ വിഗ്രഹത്തിൽ കളഭാഭിഷേകം നടത്തി. വൈകിട്ട് പടിപൂജയും പുഷ്പാഭിഷേകവും ഉണ്ടായിരുന്നു. മാസപൂജയ്ക്കായി എത്തുന്ന ഭക്തർ  വെർച്വൽ  ക്യൂ ബുക്ക് ചെയ്യണം.  അല്ലാത്തവർ   തിരിച്ചറിയൽ  രേഖകളുമായി എത്തി സ്പോട് ബുക്കിങ് ചെയ്യണം.