ബസും ജീപ്പും ഇടിച്ചു; കുടുങ്ങിയത് സ്കൂട്ടർ യാത്രികൻ

അടൂർ ∙ സ്വകാര്യ ബസും ജീപ്പും കൂട്ടിയിടിച്ച് രണ്ടു വാഹനങ്ങൾക്കുമിടിയൽ പെട്ടുപോയ സ്കൂട്ടർ യാത്രക്കാരൻ ഉൾപ്പെടെ 4 പേർക്ക് പരുക്ക്. ജീപ്പ് യാത്രക്കാരനായ മാവേലിക്കര കല്ലിമേൽ ആർ.ബിജു (45), മകൻ അമൽ ബിജു (20), പറക്കോട് നെടിയവിള ഷാജി സാമുവൽ (48), സ്കൂട്ടർ യാത്രക്കാരനായ ആദിക്കാട്ടുകുളങ്ങര ബീന മൻസിൽ സെയ്ദ് മുഹമ്മദ് സാഹിബ് (73) എന്നിവർക്കാണ് പരുക്കേറ്റത്. കായംകുളം പുനലൂർ റോഡിൽ പതിനാലാംമൈലിൽ സ്വകാര്യ ആശുപത്രിക്ക് സമീപം ഇന്നലെ വൈകിട്ട് മൂന്നോടെയായിരുന്നു അപകടം. കായംകുളം ഭാഗത്തു നിന്ന് അടൂർ ഭാഗത്തേക്കു വരികയായിരുന്ന ബസും കായംകുളം ഭാഗത്തേക്കു പോവുകയായിരുന്ന ജീപ്പും കൂട്ടിയിടിച്ചു. ജീപ്പിനു പിന്നാലെ വരികയായിരുന്ന സ്കൂട്ടർ ജീപ്പിൽ ഇടിച്ച് രണ്ടു വാഹനങ്ങൾക്കും ഇടിയിൽ പെടുകയായിരുന്നു.