ഒട്ടകത്തിന്റെ ദേഹത്ത് കാറിടിച്ച് മലയാളി സൗദിയിൽ മരിച്ചു

തിരുവനന്തപുരം∙ ഒട്ടകത്തിന്റെ ശരീരത്തിൽ  കാർ ഇടിച്ചുണ്ടായ അപകടത്തിൽ ചെറിയതുറ സ്വദേശി സൗദി അറേബ്യയിൽ മരിച്ചു. ചെറിയതുറ ടിസി 71/ 735 ഹെലൻ കോട്ടേജിൽ വിനോജ് ഗിൽബർട്ട് (38) ആണ് മരിച്ചത്. മൃതദേഹം നാട്ടിൽ എത്തിക്കാനുള്ള ശ്രമങ്ങൾ നടക്കുന്നതായി ബന്ധുക്കൾ അറിയിച്ചു.

കഴിഞ്ഞ പത്തിന് രാത്രി 9 ന്  ഹയൽ എന്ന സ്ഥലത്താണ് അപകടമുണ്ടായത്. കുബൂസ് വിതരണ കമ്പനി ജീവനക്കാരനായിരുന്നു വിനോജ്. ജോലി കഴിഞ്ഞ് കാറിൽ താമസ സ്ഥലത്തേക്ക് മടങ്ങുന്നതിനിടെ റോഡ് കുറുകെ കടക്കുകയായിരുന്ന ഒട്ടകത്തിനെ ഇടിച്ചു. ഇടിയുടെ ആഘാതത്തിൽ ഒട്ടകം കാറിനു മേലേക്ക് പതിച്ചതാണ്  മരണത്തിനിടയാക്കിയതത്രെ.

പരേതനായ ജോൺ ഗിൽബർട്ടിന്റെയും പ്രേമയുടെയും മകനാണ്. ഫെബിയാണ് ഭാര്യ. സോജ് മേരി വിനോജ് മകളാണ്. സൗമ്യ, പരേതനായ ജോൺസൺ എന്നിവരാണ് സഹോദരങ്ങൾ. ഹംപ് കടക്കുന്നതിനിടെ നിയന്ത്രണം വിട്ട ബൈക്ക് പാർവതീ പുത്തനാറിലേക്കു മറിഞ്ഞുണ്ടായ അപകടത്തിലാണ് ജോൺസൺ മരിച്ചത്.