നാവായിക്കുളത്ത് യൂത്ത് കോൺഗ്രസ്– ഡിവൈഎഫ്ഐ സംഘർഷം ; ലാത്തിച്ചാർജിൽ 2 പേർക്ക് പരുക്ക്

കല്ലമ്പലം ∙ രാഹുൽ ഗാന്ധിയുടെ ഓഫിസ് തകർത്ത സംഭവത്തിൽ പ്രതിഷേധിച്ച് യൂത്ത് കോൺഗ്രസ് നാവായിക്കുളത്ത് നടത്തിയ പ്രകടനത്തിനിടെ ഡിവൈഎഫ്ഐ പ്രവർത്തകരുമായി സംഘർഷം. തുടർന്ന് പൊലീസ് നടത്തിയ ലാത്തിച്ചാർജിൽ യൂത്ത് കോൺഗ്രസ് പ്രവർത്തകരായ കെ.എസ്.വൈശാഖ്,എ.ജെ.അരുൺ എന്നിവർക്കു പരുക്കേറ്റു. ഇന്നലെ രാത്രി 8.30ന് നാവായിക്കുളം തലവിളമുക്കിലാണു സംഭവം.

യൂത്ത് കോൺഗ്രസ് വർക്കല നിയോജക മണ്ഡലം കമ്മിറ്റി സംഘടിപ്പിച്ച പ്രകടനം തലവിളമുക്കിൽ സമാപിക്കുമ്പോൾ ഡിവൈഎഫ്ഐ പ്രവർത്തകർ ഇടിച്ചു കയറി സംഘർഷം ഉണ്ടാക്കിയതായി  കോൺഗ്രസ് ആരോപിച്ചു. എന്നാൽ കോൺഗ്രസുകാർ സിപിഎമ്മിന്റെ പതാകയും കൊടികളും നശിപ്പിക്കുകയും ആക്രമണം അഴിച്ചു വിടുകയും ചെയ്തെന്നാണ് സിപിഎമ്മിന്റെ വിശദീകരണം. വാക്കു തർക്കത്തിനൊടുവിൽ ഇരുവിഭാഗവും ഏറ്റുമുട്ടിയതോടെ പൊലീസ് ലാത്തി വീശുകയായിരുന്നു .