ഓടിക്കൊണ്ടിരുന്ന കാറിന് തീപിടിച്ചു; നാട്ടുകാർ സമയോചിതമായി ഇടപെട്ടു, ദുരന്തം ഒഴിവായി

പോത്തൻകോട് ∙ ദേശീയപാതയിൽ ചെമ്പകമംഗലം ജംക്ഷനു സമീപം ഓടിക്കൊണ്ടിരുന്ന കാറിന് തീപിടിച്ചു. നാട്ടുകാരുടെ സമയോചിതമായ ഇടപെടലിൽ ദുരന്തം ഒഴിവായി. എൻജിന്റെ ഭാഗത്തു നിന്നും തീയും പുകയും ഉയരുന്നതു കണ്ട്  ഡ്രൈവർ കാർ വശത്തേക്ക് ഒതുക്കി നിർത്തി പെട്ടെന്ന് പുറത്തിറങ്ങുകയായിരുന്നു. ഓടിയെത്തിയ സമീപവാസികൾ എക്സ്റ്റിംഗ്യൂഷർ ഉപയോഗിച്ച് തീ നിയന്ത്രണവിധേയമാക്കുകയും ചെയ്തു. തുടർന്ന് വിവരമറിഞ്ഞെത്തിയ ആറ്റിങ്ങൽ ഫയർ ആൻ്റ് റെസ്ക്യൂ അസിസ്റ്റൻ്റ് സ്റ്റേഷൻ ഓഫീസർ മനോഹരൻപിള്ളയുടെ നേതൃത്വത്തിലുള്ള  സംഘം തീ പൂർണമായും അണച്ചു. ഇന്നലെ ഉച്ചയ്ക്ക് മൂന്നോടെയായിരുന്നു സംഭവം.