പാലിലെ മായം തടയാൻ 2 ചെക്പോസ്റ്റുകളിൽ കൂടി പരിശോധന
Mail This Article
തിരുവനന്തപുരം∙ ഓണക്കാലത്ത് പാലിൽ മായം ചേർക്കുന്നത് തടയാൻ 2 ചെക് പോസ്റ്റുകളിൽ കൂടി പരിശോധന വ്യാപിപ്പിക്കാൻ ക്ഷീര വികസന വകുപ്പ് തീരുമാനിച്ചു. വാളയാർ, കുമളി എന്നീ ചെക് പോസ്റ്റുകളിലാണ് താൽക്കാലിക സംവിധാനം ഏർപ്പെടുത്തുന്നത്. മീനാക്ഷിപുരം, ആര്യങ്കാവ്, പാറശാല ചെക് പോസ്റ്റുകളിൽ പാൽ പരിശോധിക്കാൻ നിലവിൽ സ്ഥിരം സംവിധാനം ഉണ്ട്. ഇതിനു പുറമേയാണ് 2 ചെക് പോസ്റ്റുകളിലും പരിശോധന .. അടുത്ത മാസം 3 മുതൽ 7 വരെയാണ് പരിശോധന.
പാൽ, തൈര് എന്നിവ ശേഖരിച്ച് ഭക്ഷ്യ സുരക്ഷാ ഗുണനിലവാരം അനുസരിച്ചുള്ള ഘടകങ്ങൾ പരിശോധിക്കും. ഗുണനിലവാരമില്ലാത്തതും, മായം കലർന്നതും, പ്രിസർവേറ്റീവുകൾ കലർന്നതുമായ പാൽ കണ്ടെത്തിയാൽ ഭക്ഷ്യ സുരക്ഷാ വകുപ്പ് മുഖേന തുടർനടപടി സ്വീകരിക്കും. ക്ഷീര വികസന വകുപ്പിന്റെ ജില്ലാ ഗുണ നിയന്ത്രണ ഓഫിസിനു കീഴിൽ ക്വാളിറ്റി ഇൻഫർമേഷൻ സെന്ററുകളും സജ്ജമാക്കും. പൊതു വിപണിയിലെ എല്ലാ ബ്രാൻഡ് പാലും പരിശോധിക്കും. ജില്ലാ ക്വാളിറ്റി ഇൻഫർമേഷൻ സെന്ററിൽ പാൽ സാംപിളുകൾ സൗജന്യമായി പരിശോധിക്കാനും ജനങ്ങൾക്ക് അവസരമുണ്ട്.