തെക്കു പടിഞ്ഞാറൻ ബംഗാൾ ഉൾക്കടലിൽ തീവ്ര ന്യൂനമർദം; മഴ തുടരും

തിരുവനന്തപുരം ∙ തെക്കു പടിഞ്ഞാറൻ  ബംഗാൾ ഉൾക്കടലിൽ തീവ്ര ന്യൂനമർദം സ്ഥിതി ചെയ്യുന്നതിനാൽ തെക്കൻ ജില്ലകളിലും മധ്യ കേരളത്തിലും വരും ദിവസങ്ങളിൽ ഒറ്റപ്പെട്ട ഇടത്തരം മഴയ്ക്കു സാധ്യതയെന്നു കേന്ദ്ര കാലാവസ്ഥ വകുപ്പ് അറിയിച്ചു. അതേസമയം, ജനുവരിയിൽ സംസ്ഥാനത്ത് 77% അധിക മഴ ലഭിച്ചു. സാധാരണ 7.6 സെന്റിമീറ്റർ ലഭിക്കുമ്പോൾ ഇത്തവണ 13.5 സെന്റിമീറ്ററാണ് പെയ്തത്. ഏറ്റവും അധികം മഴ പെയ്തതു പത്തനംതിട്ട ജില്ലയിലാണ്. ഇടുക്കി, കോട്ടയം, കോഴിക്കോട്, പാലക്കാട്, തിരുവനന്തപുരം, തൃശൂർ ജില്ലകളിലും അധിക മഴ പെയ്തു.