മഴയിൽ വീടിന്റെ ഭിത്തിയും മേൽക്കൂരയും തകർന്നു വീണു; വയോധികയ്ക്ക് ഭാഗ്യം തുണ !

മലയിൻകീഴ് ∙ മഴയിൽ വീടിന്റെ ഭിത്തിയും മേൽക്കൂരയും തകർന്നു.  വയോധിക രക്ഷപ്പെട്ടത് ഭാഗ്യത്തിന്. മലയിൻകീഴ് പഞ്ചായത്തിലെ കുന്നുംപാറ കാണവിള റോഡരികത്തു കമലമ്മയുടെ (73) വീടിന്റെ ഒരു ഭാഗമാണ് ഇന്നലെ പുലർച്ചെ തകർന്നത്. കമലമ്മയും മകൻ സന്തോഷും മാത്രമാണ് കാലപ്പഴക്കമുള്ള 2 മുറി വീട്ടിൽ താമസിച്ചിരുന്നത്. കമലമ്മ കിടന്നിരുന്ന മുറിയുടെ മൺകട്ട കൊണ്ടുള്ള ചുവരും മേൽക്കൂരയിലെ ഷീറ്റും ആണ് നിലംപൊത്തിയത്. വീടിന്റെ ശേഷിക്കുന്ന ഭാഗം അപകടാവസ്ഥയിലാണ്. കമലമ്മയും മകനും ബന്ധുവീട്ടിലേക്കു മാറി.