താരങ്ങളായി മർലിയും ടെഡിയും ; സേനാംഗങ്ങളായി 22 നായ്ക്കൾ
Mail This Article
തൃശൂർ ∙ അന്വേഷണ മികവിന്റെ ശൗര്യവുമായി 22 നായ്ക്കൾ പൊലീസ് ഡോഗ് സ്ക്വാഡിൽ. ട്രാക്കർ വിഭാഗത്തിൽ അഞ്ചും തിരച്ചിൽ വിഭാഗത്തിൽ നാലും എക്സ്പ്ലോസീവ് വിഭാഗത്തിൽ പതിനൊന്നും നർകോട്ടിക് വിഭാഗത്തിൽ രണ്ടും നായ്ക്കളാണ് 9 മാസത്തെ പരിശീലനം പൂർത്തിയാക്കിയത്. 44 ഹാൻഡ്ലർമാരും പരിശീലനം പൂർത്തിയാക്കി. മർലി, ടെഡി, ഡോണ, കെയ്റ എന്നീ നായ്ക്കൾക്ക് അക്കാദമി ഡയറക്ടർ ബി. സന്ധ്യ മെഡലുകൾ സമ്മാനിച്ചു.
മുന്തിയ ഇനമായ ബൽജിയൻ മലെന്വയും ബീഗിൾ വിഭാഗങ്ങളിൽപ്പെട്ട 5 വീതം നായ്ക്കളും പരിശീലനം പൂർത്തിയാക്കിയവയിൽ പെടുന്നു. ഇവ ആദ്യമായാണ് സംസ്ഥാന ഡോഗ് സ്ക്വാഡിന്റെ ഭാഗമാകുന്നത്. കന്നി, ചിപ്പിപ്പാറ എന്നീ ഇന്ത്യൻ ജനുസ്സിൽപ്പെട്ട 6 നായ്ക്കളും ലാബ്രഡോർ റിട്രീവർ ഇനത്തിലുള്ള 6 നായ്ക്കളും പരിശീലനം പൂർത്തിയാക്കി. ഡിഐജി (ട്രെയിനിങ്) നീരജ് കുമാർ ഗുപ്ത, അസി. ഡയറക്ടർ ടി.കെ. സുബ്രഹ്മണ്യൻ എന്നിവർ ചടങ്ങിൽ പങ്കെടുത്തു.