കളഞ്ഞ് കിട്ടിയ 6 പവനും പണവും ഉടമയ്ക്ക് നൽകി ഓട്ടോ ഡ്രൈവറും ബൈക്ക് യാത്രക്കാരനും

കിള്ളിമംഗലം∙ വഴിയോരത്ത് നിന്ന് കളഞ്ഞ് കിട്ടിയ ആറു പവൻ സ്വർണവും, പണവും ഉടമയ്ക്ക് കൈമാറി ഓട്ടോ ഡ്രൈവറും, ബൈക്ക് യാത്രക്കാരനും മാതൃകയായി. കിള്ളിമംഗലം ഉദുവടി പ്രദേശത്ത് നിന്ന് ഇന്ന് രാവിലെയാണ് യാത്രക്കാരായ കിള്ളിമംഗലം സ്വദേശിയും ഓട്ടോ ഡ്രൈവറുമായ അബുവിനും, ബൈക്ക് യാത്രക്കാരനായ സതീഷിനും ആറു പവൻ സ്വർണവും, ഏഴായിരത്തോളം രൂപയും കളഞ്ഞ് കിട്ടിയത്.

സ്വർണവും പണവും അടങ്ങുന്ന ബാഗ് ഇരുവരും ചേർന്ന് ചേലക്കര പൊലീസ് സ്റ്റേഷനിൽ എത്തിച്ചു. പൊലീസിന്റെ അന്വേഷണത്തിൽ ഉടമ തോന്നൂർക്കര സ്വദേശി സുഭാഷിന്റേതാണെന്നു കണ്ടെത്തി.സ്റ്റേഷനിലേക്ക് വിളിപ്പിച്ച് സ്വർണവും, പണവുമടങ്ങുന്ന ബാഗ് കൈമാറി. എസ്ഐ മാരായ കെ.ജെ. പ്രവീൺ, എം.ഹംസ, എഎസ്ഐ കബീർ, എസ്സിപിഒ അജിത്ത്. സിപിഒമാരായ നൗഫൽ,വിജയൻ എന്നിവർ നേതൃത്വം നൽകി.