കഥകളി തുടങ്ങി പെൺകുട്ടികൾ; കലാമണ്ഡലത്തിൽ ചരിത്രമുദ്ര

ചെറുതുരുത്തി  ∙ 2021 ഡിസംബർ ഒന്ന് കലാമണ്ഡലത്തിന്റെ ചരിത്രത്താളുകളിൽ ഇടം പിടിച്ചു. ഔപചാരിക വിദ്യാഭ്യാസ രീതിയിൽ ആദ്യമായി കലാമണ്ഡലത്തിൽ പെൺകുട്ടികൾ കഥകളി പഠനം ആരംഭിച്ച ദിവസമായി ഈ ദിനം അറിയപ്പെടും. എട്ടാം ക്ലാസിലാണു പ്രവേശനം നൽകിയത്. അധ്യയന വർഷാരംഭമായ ഇന്നലെ 11 വിദ്യാർഥികളാണ് കഥകളി പഠിക്കാൻ എത്തിയത്. ഇതിൽ 8 പേർ പെൺകുട്ടികളാണ്. കഥകളി വടക്കൻ വിഭാഗം മേധാവി കലാമണ്ഡലം സൂര്യനാരായണന്റെ കീഴിൽ 5 പെൺകുട്ടികളും ഒരു ആൺകുട്ടിയും പഠനം തുടങ്ങി.‌ തെക്കൻ വിഭാഗം മേധാവി കലാമണ്ഡലം രവികുമാറിന്റെ കീഴിൽ 3 പെൺകുട്ടികളും രണ്ടു ആൺകുട്ടികളുമാണു പരിശീലനം നടത്തുന്നത്.

വടക്കൻ വിഭാഗത്തിൽ ദുർഗ രമേഷ് (ഇടുക്കി), കെ.എസ്.ആര്യ ( വട്ടംകുളം, മലപ്പുറം), ശ്വേത ലക്ഷ്മി (കോഴിക്കോട്), എം.എ. ത്രയംബക (കോഴിക്കോട്), എ.അക്ഷയ (കറുകപുത്തൂർ), വി.അഭിജിത്ത് ( വരവൂർ). കഥകളി തെക്കൻ വിഭാഗത്തിൽ ദേവനന്ദ (കൊല്ലം), വൈഷ്ണവി (പത്തനംതിട്ട) , കൃഷ്ണപ്രിയ (ആലപ്പുഴ), കാശിനാഥൻ ( ഹരിപ്പാട്), അർജുൻ (കൊല്ലം) എന്നിവരാണ് പരിശീലനം തേടുന്നത്. രാവിലെ 9 മുതൽ 12.30 വരെ കളരി പഠനവും രണ്ടു മുതൽ അഞ്ചുവരെ സ്കൂൾ പഠനവുമാണു നടക്കുക.