‘തുറന്ന വായനശാല’ ഒരുക്കി മണത്തല സ്കൂൾ വിദ്യാർഥികൾ

ചാവക്കാട്∙ ബ്ലാങ്ങാട് ബീച്ചിൽ മത്സ്യത്തൊഴിലാളികൾക്ക് വായിക്കാൻ ‘തുറന്ന വായനശാല’ ഒരുക്കി മണത്തല ഗവ.ഹയർസെക്കൻഡറി സ്കൂൾ എൻഎസ്എസ് വിദ്യാർഥികൾ. ഇവിടെയുള്ള നൂറുകണക്കിന് മത്സ്യത്തൊഴിലാളികൾക്കും കടൽ കാണാനെത്തുന്ന സഞ്ചാരികൾക്കും വായനശാല പ്രയോജനകരമാകും. തുറന്ന അലമാരയിൽ നൂറ്റിയൻമ്പതോളം പുസ്തകങ്ങളാണ് ആദ്യഘട്ടത്തിൽ വച്ചിട്ടുള്ളത്. ആർക്കും പുസ്തകമെടുത്തു വായിച്ച ശേഷം അലമാരയിൽ തിരിച്ചുവയ്ക്കാവുന്ന രീതിയിലാണ് സജ്ജീകരിച്ചിട്ടുള്ളത്.

എൻഎസ്എസ് അംഗങ്ങളും സ്കൂളിലെ അധ്യാപകരും ശേഖരിച്ച പുസ്തകങ്ങളാണ് വായനശാലയിൽ വച്ചിട്ടുള്ളത്. നഗരസഭ വിദ്യാഭ്യാസ സ്ഥിരം സമിതി അധ്യക്ഷ പ്രസന്ന രണദിവേ ഉദ്ഘാടനം ചെയ്തു. കൗൺസിലർ പി.കെ.കബീർ അധ്യക്ഷത വഹിച്ചു. പ്രോഗ്രാം ഓഫിസർ പി.പി.റജുല, പി.വി.സന്ധ്യ, ഇന്ദു ചന്ദ്രൻ, ദേവി, സൗമ്യ എന്നിവർ പ്രസംഗിച്ചു. വൊളന്റിയേഴ്സിന്റെ ചിത്ര പ്രദർശനം പ്രിൻസിപ്പൽ പി.പി.മറിയക്കുട്ടി ഉദ്ഘാടനം ചെയ്തു.