തൃശൂർ നഗരത്തിൽ വ്യാപാര സ്ഥാപനം കത്തിനശിച്ചു

തൃശൂർ ∙ പ്രസ് ക്ലബ്ബിനു സമീപം വസ്ത്ര വ്യാപാര സ്ഥാപനം കത്തിനശിച്ചു. കോർണർ ഷോപ് എന്ന സ്ഥാപനത്തിൽ ഇന്നലെ പുലർച്ചെ നാലിനായിരുന്നു തീപിടിത്തം. മൂന്നു ലക്ഷം രൂപയോളം വിലവരുന്ന തുണിത്തരങ്ങളും ഫർണിച്ചറും അനുബന്ധ സാമഗ്രികളും നശിച്ചതായാണ് പ്രാഥമിക കണക്ക്. അഗ്നിരക്ഷാസേന ഉടനെയെത്തി തീയണച്ചു. വെള്ളമടിച്ചു നനച്ചിട്ടതിനാൽ സമീപത്തേയ്ക്കു തീ പടർന്നില്ല.

പൊലീസ് പട്രോളിങ് ടീം ആണ് കടയിൽ നിന്ന് പുക ഉയർന്നതു കണ്ട് സേനയെ വിവരമറിയിച്ചത്. ഷോർട് സർക്യൂട്ട് ആണ് തീപിടിത്തത്തിനു കാരണം. എഎസ്ടിഒ രഘുനാഥൻ നായർ, സീനിയർ ഫയർ ആൻഡ് റെസ്ക്യു ഓഫിസർ എം.രാജൻ, ഓഫിസർമാരായ എ. എസ്. അനിൽജിത്ത്, പി.കെ. പ്രതീഷ്, ജി.പ്രമോദ്, വിബിൻ ബാബു, പി.സജിൻ, ബി.ബിനിൽ, ആർ.രാകേഷ് ബി.ദിനേഷ്, വി.വി.ജിമോദ്, നവനീത് കണ്ണൻ എന്നിവരാണ് രക്ഷാപ്രവർത്തനം നടത്തിയത്.