ചാൻസലർ മല്ലിക സാരാഭായിക്ക് കലാമണ്ഡലത്തിൽ സ്വീകരണം; പിജി വിദ്യാർഥിനികളോടൊപ്പം ചുവടുവച്ചു
Mail This Article
ചെറുതുരുത്തി ∙ കേരള കലാമണ്ഡലം ചാൻസലറായി നിയമിതയായ മല്ലിക സാരാഭായിക്ക് കലാമണ്ഡലത്തിൽ സ്വീകരണം നൽകി. ഇന്നലെ വൈകിട്ട് നാലിന് നിള ക്യാംപസിൽ (പഴയ കലാമണ്ഡലം) എത്തിയ ചാൻസലർ വള്ളത്തോൾ സമാധിയിൽ പുഷ്പാർച്ചന നടത്തി. തുടർന്ന് നൃത്ത കളരിയിൽ എത്തി പിജി വിദ്യാർഥിനികളുടെ നൃത്തം കാണുകയും അവരോടൊപ്പം ചുവടുവയ്ക്കുകയും ചെയ്തു.
ആർട്ട് ഗാലറിയും സന്ദർശിച്ചു. ശേഷം കലാമണ്ഡലത്തിൽ എത്തിയ ചാൻസലറെ വൈസ് ചാൻസലർ ഡോ. എം. വി. നാരായണൻ, റജിസ്ട്രാർ ഡോ. പി. രാജേഷ് കുമാർ, ഭരണ സമിതി അംഗം ടി. രവീന്ദ്രനാഥ്, വള്ളത്തോൾ നഗർ ഗ്രാമ പഞ്ചായത്ത് പ്രസിഡന്റ് ഷെയ്ക്ക് അബ്ദുൽ ഖാദർ എന്നിവരുടെ നേതൃത്വത്തിൽ പഞ്ചവാദ്യത്തിന്റെ അകമ്പടിയോടെ സ്വീകരിച്ചു.
ചാൻസലർ പദവി ഏറ്റെടുത്ത ശേഷം ആദ്യമായാണ് മല്ലിക സാരാഭായ് കലാമണ്ഡലത്തിൽ എത്തുന്നത്. കുട്ടിക്കാലത്ത് അമ്മ മൃണാളിനി സാരാഭായിയുടെ കൂടെ കലാമണ്ഡലത്തിൽ വന്ന ഓർമകൾ പങ്കുവച്ചു. അഞ്ച് ദിവസം കലാമണ്ഡലത്തിൽ തങ്ങുന്ന ചാൻസലർ 10 ന് മടങ്ങും.