മണ്ണുത്തി ∙ ക്രമരഹിതമായി സ്ഥാനക്കയറ്റം ലഭിച്ചവരിൽ നിന്ന് ശമ്പളത്തിൽ ലഭിച്ച അധിക തുക തിരിച്ചുപിടിക്കാനുള്ള തീരുമാനം കാർഷിക സർവകലാശാല ഭരണസമിതി യോഗം റദ്ദാക്കി. 2011 ഫെബ്രുവരി ഒന്നിനുശേഷം സർവീസിൽ പ്രവേശിച്ച ജീവനക്കാരിൽ സ്ഥാനക്കയറ്റം അനുവദിച്ച തീയതിയിൽ വ്യത്യാസം വന്നിരുന്നു. ഇതിനെത്തുടർന്നു ശമ്പളത്തിൽ അധികമായി ലഭിച്ച 9.29 ലക്ഷം രൂപ തിരിച്ചുപിടിക്കാൻ നേരത്തെ ഉത്തരവിറങ്ങിയിരുന്നു. 55 ജീവനക്കാരിൽ നിന്നാണു പണം തിരിച്ചുപിടിക്കാൻ ഉത്തരവായത്. ജീവനക്കാരുടെ ചുരുങ്ങിയ സേവനകാലാവധിയും ശമ്പളത്തിലെ കുറവും പരിഗണിച്ചാണ് പണം തിരിച്ചുപിടിക്കാനുള്ള തീരുമാനം റദ്ദാക്കിയതെന്നാണു വിശദീകരണം. എന്നാൽ കടക്കെണിയിലായ സർവകലാശാലയ്ക്കു ലക്ഷങ്ങൾ നഷ്ടപ്പെടാനുള്ള കാരണക്കാർക്കതിരെ എന്തു നടപടിയെടുക്കുമെന്ന കാര്യം ഉത്തരവിലില്ല.